काठमाडौं– राष्ट्रिय स्वतन्त्र पार्टी (रास्वपा)को पहिलो महाधिवेशनमा एकपछि अर्को विवाद र समस्या देखिन थालेका छन्।

सोमबारदेखि नै सुरू हुने भनिएको बन्दसत्र मंगलबार मात्रै दुई पटक सरिसकेको छ। दिउँसो १ बजे सुरू हुने भनिएको बन्दसत्र अहिले २ बजे पनि सुरू हुन सकेको छैन । दिउँसो १ बजेबाट सुरू गर्न सम्भव नभएपछि २ बजेबाट थाल्ने भनिएको थियो। तर प्रतिनिधिको विवादले अझै सुरसार नभएको हो।

महाधिवेशन प्रतिनिधिको नामावली र व्यवस्थापनलाई लिएर देखिएको विवाद समाधान हुन नसकेपछि बन्दसत्रमा ढिलाइ भएको हो।

प्रतिनिधि विभाग टुङ्ग्याएर बन्दसत्र अघि बढाउने तयारी भए पनि सहमति नजुट्दा प्रक्रिया प्रभावित भएको छ।

महामन्त्री कविन्द्र बुर्लाकोटी लगायतका नेताहरू बन्दसत्र सुरू गर्ने तयारीमा जुटे पनि प्रतिनिधि सूचीलाई लिएर विभिन्न समूहका नेता-कार्यकर्ताले असन्तुष्टि जनाउँदै दबाब बढाएका बताउँछन् ।

विभिन्न स्थानबाट आएका प्रतिनिधिहरूले आफूहरूको नाम समावेश नभएको भन्दै आपत्ति जनाएका छन्। यसले महाधिवेशन स्थलमा असन्तुष्टि र विवादको अवस्था सिर्जना भएको छ।

पार्टी नेतृत्वले विवाद समाधान गरी बन्दसत्र अघि बढाउने प्रयास गरिरहेको भए पनि अहिलेसम्म औपचारिक रूपमा प्रक्रिया सुरू हुन सकेको छैन।