काठमाडौं- विश्वप्रसिद्ध कान्स फिल्म फेस्टिभलमा नेपाली चलचित्रले ऐतिहासिक सफलता हासिल गरेको छ । अविनाश विक्रम शाहद्वारा निर्देशित फिल्म ‘एलिफेन्ट्स इन द फग’ले महोत्सवको प्रतिष्ठित ‘अन सर्टेन रिगार्ड’ विधा अन्तर्गत ‘जुरी प्राइज’ हात पारेको हो । मुख्य प्रतिस्पर्धापछिको यो दोस्रो महत्त्वपूर्ण विधा मानिन्छ ।

यस विधाको शीर्ष उपाधि ‘अन सर्टेन रिगार्ड प्राइज’ भने सान्ड्रा वुल्नर निर्देशित ‘एभ्रिटाइम’ले जित्यो भने त्यसपछिको ठूलो विधामा नेपाली फिल्म उत्कृष्ट ठहरियो ।

ऐतिहासिक जितपछि खुसी साट्दै निर्देशक शाहले सफलताको जस आफ्नो सम्पूर्ण टोलीलाई सुम्पिँदै भने, “अँध्यारो कुरालाई पनि उजागर गर्ने सामर्थ्य सिनेमामा हुन्छ । हाम्रो कथाले यो अन्तर्राष्ट्रिय मञ्च पाउनु र यसरी चिनिनु भनेकै अदृश्य विषयहरू दृश्यमान हुनु हो ।”

यो फिल्मले हात्तीको आतंकबाट त्रसित एउटा गाउँको पारिवारिक कथा बोल्छ, जहाँ आमा र छोरीको सम्बन्धलाई मुख्य रूपमा उतारिएको छ ।

पुरस्कार घोषणा हुनासाथ नेपाली टोलीले स्टेजमै नाचेर आफ्नो उत्साह व्यक्त गरेका थिए ।