काठमाडौं – काठमाडौं महानगरपालिकाले नयाँ शैक्षिक सत्र २०८३ अन्तर्गत विद्यालय सञ्चालन सम्बन्धी सूचना जारी गरेको छ। महानगरको शिक्षा तथा स्वास्थ्य समितिको बिहीबारकाे निर्णयअनुसार काठमाडौँ भित्रका सबै विद्यालयमा पठनपाठन तथा शैक्षिक गतिविधि आगामी वैशाख १५ गतेदेखि सुरु गरिने भएको हो ।

महानगरले नेपाल सरकार को निर्णय तथा काठमाडौँ उपत्यका मेयर्स फोरमको अनुरोधलाई ध्यानमा राख्दै शिक्षक, कर्मचारी र विद्यार्थीमा परेको प्रभाव, विद्यालय व्यवस्थापन समितिको तयारी तथा समग्र परिस्थितिको विश्लेषणपछि यस्तो निर्णय गरेको जनाएको छ।

सूचनामा सरोकारवालाहरूबीच देखिएको अन्योल हटाउन व्यावहारिक आधारमा विद्यालय सञ्चालन गर्ने निर्णय गरिएको उल्लेख छ। यससँगै सम्बन्धित सबै विद्यालयलाई आवश्यक तयारी गरी निर्धारित मितिदेखि नियमित रूपमा पठनपाठन सञ्चालन गर्न निर्देशन दिइएको छ।

महानगरले विद्यालय निरीक्षक तथा स्रोत शिक्षकहरूलाई आफ्नो क्षेत्रमा सूचना प्रवाह तथा समन्वय गर्न पनि आग्रह गरेको छ। साथै सूचना प्रविधि विभागलाई उक्त सूचना आधिकारिक वेबसाइटमार्फत सार्वजनिक गर्न भनिएको छ।