तेलअभिभ- इजरायलले देशकै चर्चित बेन ग्युरियन विमानस्थल खाली गराएको छ। इजरायली सञ्चारमाध्यमका अनुसार इरानबाट मिसाइल प्रहार भएपछिको साइरन बजेसँगै तेल अभिभस्थित बेन ग्युरियन एयरपोर्ट खाली गराएर यात्रुलाई सेल्टर (आश्रयस्थल) मा सारिएको छ।

इजरायलको च्यानल १२ टेलिभिजनका अनुसार मिसाइल रोक्ने प्रयासका क्रममा केन्द्रीय इजरायलमा विस्फोटको शक्तिशाली आवाज आएको थियो। त्यसपछि साइरन बजेलगत्तै यात्रुहरूलाई सुरक्षित स्थानमा सारिएको हो।

हार्टेज अनलाइनका अनुसार उक्त मिसाइलले क्लस्टर प्रकारका हतियार बोकेको हुन सक्ने आशंका गरिएको छ।

उता दक्षिणी शहरमा अर्को आक्रमण भएको छ। इजरायल हायोमको रिपोर्टअनुसार मिसाइलका टुक्राले दक्षिणी शहर अश्केलोनमा एउटा भवन क्षतिग्रस्त भएको छ । ।

उक्त पत्रिकाले मिसाइलका टुक्राहरू दक्षिणी इजरायलको याड मोर्देचाई समुदायको बस्तीमा पनि खसेको जनाएको छ। तर यसबाट मानवीय वा सम्पत्ति क्षति भएको छैन।