काठमाडौं- अमेरिकी राष्ट्रपति डोनाल्ड ट्रम्पले होर्मुजको जलडमरु खुला नगरे इरानका ऊर्जा केन्द्रमा आक्रमण गर्ने धम्की दिएपछि इरानको सैन्य र सुरक्षा अधिकारीहरूले त्यसको कडा प्रतिवाद गरेका छन् ।

इरानको राष्ट्रिय रक्षा परिषद्ले विज्ञप्ति जारी गर्दै इरानी तटीय क्षेत्र वा टापुहरूमा आक्रमणको कुनै पनि प्रयास भएमा फारसको खाडीका सबै सञ्चार र पारवहन मार्गहरूमा समुद्री धराप बिछ्याउने चेतावनी दिएको छ ।

परिषद्का अनुसार अब सो जलक्षेत्रबाट यात्रा गर्ने एक मात्र विकल्प भनेको युद्धमा संलग्न नभएका देशहरूले इरानसँग समन्वय गर्नु नै हो ।

राष्ट्रपति ट्रम्पले अहिले इरानको खार्ग टापु कब्जा गर्ने विषयमा छलफल गरिरहेका छन् । इरानको तटबाट करिब १५ माइल टाढा खाडीको उत्तरी भागमा अवस्थित यो टापु रणनीतिक रूपमा निकै महत्त्वपूर्ण मानिन्छ ।

इरानको कुल तेल निर्यातको ९० प्रतिशत हिस्सा ओगट्ने भण्डारण ट्याङ्की र पम्पिङ सुविधाहरू यही टापुमा रहेका छन्।