बेरुत – इजरायली सेनाले दक्षिणी लेबनानका महत्त्वपूर्ण भौतिक पूर्वाधार र पुललाई निसाना बनाउँदै बमबारी तीव्र पारेको छ । लेबनानी राष्ट्रपति जोसेफ आउनले दक्षिणी लेबनानका अत्यावश्यक सुविधामाथि इजरायलले गरेको आक्रमणको कडा शब्दमा निन्दा गरेका छन् ।

राष्ट्रपति आउनका अनुसार इजरायलले विशेषगरी लितानी नदीमाथिको कासमिया पुल र अन्य रणनीतिक पुलहरूलाई ध्वस्त पारेको छ । उनले यी आक्रमणलाई लेबनानी नागरिकमाथिको ‘सामूहिक सजाय’ को संज्ञा दिएका छन् ।

बीबीसीका मध्यपूर्व संवाददाता ह्युगो बाचेगाका अनुसार इजरायलले लेबनानका पुललाई लक्षित गर्नुका पछाडि सैन्य रणनीति लुकेको छ । इजरायलले यी पुल ध्वस्त पारेर दक्षिणी लेबनानलाई देशको अन्य भागबाट अलग्याउन र हिजबुल्लाहको सैन्य आपूर्ति शृङ्खला तोड्न खोजेको विश्लेषण गरिएको छ ।

विशेषगरी लितानी नदीमाथिका पुल भत्काइँदा हिजबुल्लाहका लडाकु र हतियार ओसारपसारमा अवरोध पुग्ने इजरायली दाबी छ।

यद्यपि, यी पुलहरू भत्किँदा खाद्यान्न, औषधि र मानवीय सहायता सामग्री ढुवानीमा समेत गम्भीर असर परेको छ, जसले गर्दा दक्षिणी लेबनानमा मानवीय सङ्कट थप गहिरिएको छ ।