काठमाडौँ- नेपाली कांग्रेसले आगामी निर्वाचनलाई लक्षित गर्दै विभिन्न सहरमा चुनावी सभा गर्ने निर्णय गरेको छ। पार्टीले फागुन १४ गते सुर्खेत, १५ गते पोखरा र १७ गते काठमाडौंमा चुनावी सभा आयोजना गर्ने तय गरेको हो।

सभामा शीर्ष नेताहरूको सहभागिता रहनेछ। सभामार्फत कांग्रेसले आफ्नो चुनावी एजेन्डा, नीति तथा कार्यक्रम सार्वजनिक गर्ने र मतदातासँग प्रत्यक्ष संवाद गर्ने तयारी गरेको जनाएको छ।

सुर्खेत, पोखरा र काठमाडौंका सभालाई विशेष महत्वका साथ हेरिएको कांग्रेस नेताहरूले बताएका छन्।

यसैबीच, अन्य जिल्लामा आयोजना गरिने चुनावी सभाको मिति भने अझै टुंगिन बाँकी रहेको छ। प्रदेश र जिल्ला कार्यसमितिसँग परामर्श गरेर क्रमशः तालिका सार्वजनिक गरिने कांग्रेसले जनाएको छ।

निर्वाचन नजिकिँदै जाँदा प्रमुख दलहरूले देशभर चुनावी अभियान तीव्र पारिरहेका छन्। कांग्रेसले पनि केन्द्रदेखि गाउँस्तरसम्म संगठन परिचालन गर्दै प्रचार अभियानलाई विस्तार गर्ने तयारी गरेको छ।