काठमाडौं – दक्षिण अफ्रिकाका आक्रामक ब्याटर डेभिड मिलर नेपाल प्रिमियर लिग ९एनपीएल० को तेस्रो संस्करणका लागि कर्णाली याक्समा अनुबन्धित भएका छन् ।

फ्रेन्चाइज क्रिकेटमा लामो अनुभव बटुलेका मिलरको आगमनले कर्णाली याक्सको ब्याटिङ पक्ष थप बलियो हुने अपेक्षा गरिएको छ। बायाँहाते ब्याटर मिलर आक्रामक ब्याटिङ र दबाबपूर्ण अवस्थामा खेललाई आफ्नो पक्षमा पार्न सक्ने क्षमताका लागि परिचित छन्।

मिलरले दक्षिण अफ्रिकाका लागि अन्तर्राष्ट्रिय क्रिकेटका विभिन्न प्रारूपमा प्रतिनिधित्व गरिसकेका छन्। उनले विश्वका विभिन्न फ्रेन्चाइज प्रतियोगितामा समेत खेलेका छन्। विशेषगरी टी–२० क्रिकेटमा तीव्र गतिमा रन बनाउने र इनिङ्सको अन्त्यतिर आक्रामक ब्याटिङ गर्ने उनको क्षमता टोलीका लागि उपयोगी मानिन्छ।

एनपीएलको तेस्रो संस्करण अक्टोबर २६ देखि काठमाडौंको कीर्तिपुरस्थित त्रिवि अन्तर्राष्ट्रिय क्रिकेट मैदानमा सुरु हुँदैछ। प्रतियोगिताको फाइनल नोभेम्बर २१ मा हुनेछ।

कर्णाली याक्सले यस संस्करणका लागि विदेशी खेलाडी अनुबन्ध गर्ने क्रमलाई तीव्र बनाएको छ। मिलरको अनुबन्धसँगै टोलीले अन्तर्राष्ट्रिय अनुभव भएका खेलाडीलाई समेट्दै प्रतियोगितामा बलियो प्रदर्शन गर्ने लक्ष्य राखेको देखिन्छ।