काठमाडौँ– राष्ट्रिय स्वतन्त्र पार्टी (रास्वपा) का सभापति रवि लामिछानेले आफ्नो भारत भ्रमण पूर्णतः व्यक्तिगत तथा धार्मिक रहेको स्पष्ट पारेका छन्। उनले भ्रमणका क्रममा कुनै राजनीतिक भेटघाटको कार्यक्रम नरहेको जनाउँदै यस विषयमा अनावश्यक अड्कलबाजी नगर्न आग्रह गरेका छन्।

‘कुनै राजनीतिक भेटघाट छैन । कसैलाई खिचडी नपकाउन पनि अनुरोध गर्न चाहन्छु,’ लामिछानेले भने, ‘यो मेरो असाध्यै व्यक्तिगत भ्रमण भएकाले कहिलेकाहीँ व्यक्तिगत कुरा र राजनीतिक कुरालाई अलग्याउन सक्नुपर्छ। त्यसलाई अलग्याउन सहयोग गर्न आग्रह गर्न चाहन्छु।’

लामिछानेले आफू कारागारमा रहँदा भारतको उत्तराखण्डस्थित नैनीतालमा रहेको कैँची धाम जाने भाकल गरेको उल्लेख गर्दै सोही भाकल पूरा गर्न भारत जान लागेको बताएका छन्।

भ्रमणका क्रममा उनी परिवारसहित उत्तराखण्डको नैनीतालस्थित कैँची धाम र आसामको गुवाहाटीस्थित कामाख्या मन्दिर पुगेर पूजाआजा गर्ने कार्यक्रम छ।

धार्मिक आस्था, पारिवारिक संस्कार र आध्यात्मिक विश्वासका कारण भारत भ्रमण गर्ने योजना पहिलेदेखि नै रहेको उनले बताए। कारागारमा रहँदा गरेको भाकल पूरा गर्नसमेत भ्रमण गर्न लागेको उनको भनाइ छ।