काठमाडौं– दसैंको माहौललाई थप मनोरञ्जक बनाउने तयारीमा रहेको चलचित्र ‘छ माया छपक्कै २’को शीर्ष गीत सार्वजनिक भएको छ । 

फूलपातीको दिन अर्थात् असोज ३१ गतेदेखि प्रदर्शनमा आउने तयारीमा रहेको चलचित्रको गीतले परिवार, प्रेम, दाम्पत्य सम्बन्ध र सन्तानसँग जोडिएका रमाइला क्षणलाई केन्द्रमा राखेको छ।

अभि सुनारको शब्द तथा संगीत रहेको गीतमा करण परियार, अभि सुनार, विशाल निरौला र रश्मि विश्वकर्माले स्वर दिएका छन् ।

गीतको भिडियो भने ‘बेबी सावर’को उत्सवमय परिवेशमा तयार पारिएको छ । भिडियोमा दीपकराज गिरी, केकी अधिकारी र सनिशा भट्टराईलाई गर्भवती भूमिकामा देखाइएको छ। परिवारभित्रको माया, हाँसो, रमाइलो नोकझोक र खुसीलाई गीतमा नृत्य र हास्य शैलीमार्फत प्रस्तुत गरिएको छ ।

भिडियोमा रायन गिरी, प्रकाश घिमिरे, रमा थपलिया, बुद्धि तामाङ, कर्म शाक्य, विष्णु सापकोटा, मेक्सम गौडेल, रवीन्द्र झा, सरदा गिरी, जेसिका पोखरेल र दीपाश्री निरौलालगायत कलाकार पनि देखिन्छन् ।

आमा सरस्वती मुभिज र रोहित अधिकारी फिल्म्सको संयुक्त प्रस्तुतिमा बनेको चलचित्रलाई दीपेन्द्र लामाले निर्देशन गरेका हुन्। कथा लामाकै हो भने पटकथा दीपकराज गिरीले तयार पारेका हुन् । 

रोहित अधिकारी निर्माता रहेको फिल्म २०७६ मा व्यावसायिक रूपमा सफल भएको ‘छ माया छपक्कै’को दोस्रो शृङ्खला हो। पहिलो भागकै शैलीलाई निरन्तरता दिँदै यसपटक पनि पारिवारिक तथा सामाजिक विषयलाई हास्यव्यङ्ग्यसँग जोडेर प्रस्तुत गरिएको निर्माणपक्षले जनाएको छ ।