काठमाडौँ – मुख्य प्रशिक्षक जोसे मोरिन्होको दोस्रो कार्यकालको पहिलो प्रतिस्पर्धात्मक खेलमा रियल म्याड्रिडले रोमाञ्चक जित हात पारेको छ । ९० औँ मिनेटमा कार्लोस एस्पीले गरेको निर्णायक गोलको मद्दतमा म्याड्रिडले एस्पानियोललाई पराजित गरेको हो ।

एस्पानियोलको मैदानमा भएको खेलको नवौँ मिनेटमै म्याड्रिडले अग्रता लिएको थियो । आर्डा गुलरको फ्री-किकमा जुड बेलिङहमले हेडरमार्फत गोल गर्दै टोलीलाई सुरुआती अग्रता दिलाएका थिए । तर, ३० औँ मिनेटमा एस्पानियोलका नयाँ खेलाडी कालाले गोल गर्दै खेल १–१ को बराबरीमा ल्याए ।

अधिकांश समय खेलमा पकड जमाएको म्याड्रिडका दुई प्रयास पोलमा ठोक्किएका थिए । बेलिङहमको कडा हेडर एस्पानियोलका गोलरक्षक मार्को डिमिट्रोभिचले बारमा ठोक्काउँदै जोगाएका थिए भने फेडेरिको भल्भर्डेको प्रहार पोस्टको तल्लो भागमा लागेर बाहिरिएको थियो ।

त्यसपछि वैकल्पिक खेलाडीका रूपमा मैदान प्रवेश गरेका डेब्युट्यान्ट एस्पीले अन्तिम मिनेटमा गोल गर्दै टोलीलाई जित दिलाए । १२ करोड पाउन्डमा क्लब भित्रिएका यान डिओमान्डेले किलिएन एम्बाप्पेलाई दिएको पासमा बल नियन्त्रणमा लिँदै एस्पीले उत्कृष्ट गोल गरेका थिए ।

मोरिन्होले यसै सिजन क्लबमा अनुबन्ध भएका डेन्जेल डम्फ्रिज, इब्राहिमा कोनाटे र बर्नार्डो सिल्भालाई पहिलो रोजाइमै मैदान उतारेका थिए । सन् २०१० देखि २०१३ सम्म म्याड्रिडको प्रशिक्षक रहँदा ला लिगा र कोपा डेल रे जिताएका ६३ वर्षीय मोरिन्हो गत जुलाईमा तीन वर्षका लागि पुनः म्याड्रिड फर्किएका हुन् ।