नयाँ दिल्ली— भारतको राजधानी दिल्लीस्थित जन्तर-मन्तरमा विद्यार्थीहरूको धर्ना तथा प्रदर्शन जारी छ । उनीहरुले शिक्षामन्त्री धर्मेन्द्र प्रधानको रजीनामा माग्दै प्रदर्शन गरिरहेका छन् ।

प्रदर्शनको आह्वानकर्ता ककरोच जनता पार्टीले आन्दोलन थप सशक्त बनाउने घोषणा गरेको छ । पार्टीले शुक्रबार देशभर विशाल विरोध प्रदर्शनमा सहभागी हुन सार्वजनिक आह्वान गरेको हो ।

सीजेपीले यस प्रदर्शनबारे जानकारी दिन डिजिटल पम्फलेट जारी गरेको छ । हाल उक्त पम्फलेट सामाजिक सञ्जालहरूमा भाइरल भइरहेको छ । पम्फलेटमार्फत पार्टीले सर्वसाधारण तथा विद्यार्थीहरूलाई ठूलो संख्यामा उपस्थित भई शान्तिपूर्ण प्रदर्शन गर्न र एकबद्धता जनाउन अपिल गरेको छ ।

प्रचार सामग्रीमा ‘एभ्री डिस्ट्रिक्ट, वान डे, वान डिमान्ड’ को सन्देश दिइएको छ । प्रदर्शनको व्यवस्थापनका लागि स्थानीय स्तरमा छात्र संगठन र अन्य सामाजिक संस्थाहरूसँग समन्वय गरी अनुमति तथा आवश्यक तयारी गर्न भनिएको छ ।

प्रदर्शनका क्रममा भेला भएका मानिसहरूमाझ विद्यार्थीका मागहरू सार्वजनिक रूपमा वाचन गर्न र प्रहरी दमनको सामना गरेकाहरूप्रति सहानुभूति प्रकट गर्न आह्वान गरिएको छ। आन्दोलनलाई व्यवस्थित बनाउन मानक सञ्चालन प्रक्रिया (एसओपी), प्रचार सामग्री र ज्ञापनपत्रको ढाँचा पार्टीको आधिकारिक वेबसाइटमा उपलब्ध गराइएको छ।

पोस्टरको अन्त्यमा ‘इन्कलाब जिन्दाबाद’ र ‘भारत माता की जय’ जस्ता नारासहित देशभरका नागरिकहरूलाई यस शान्तिपूर्ण विरोध प्रदर्शनमा सहभागी भई सफल बनाउन अपिल गरिएको छ।