काठमाडौं- प्रमुख अन्तर्राष्ट्रिय विमानस्थलमा स्वचालित सिसाको ढोका तोडफोड गरेको आरोपमा एक चिनियाँ नागरिकलाई थाइल्यान्डले प्रवेशमा आजीवन प्रतिबन्ध लगाएको छ । मध्य समुत प्राकान प्रान्तमा रहेको विमानस्थलको अध्यागमन क्षेत्रमा ती ३० वर्षीय पुरुषले नियम पालना नगर्दा सो दुर्घटना भएको हो ।

चिनियाँ सञ्चारमाध्यम र स्थानीय समाचार संस्था बैंकक पोस्टका अनुसार गत बुधबार ती व्यक्तिले स्वचालित ढोका प्रयोग गर्दा प्रणालीमा समस्या आएको थियो । त्यसपछि आक्रोशित हुँदै उनले सिसाको ढोकामा दुई पटकसम्म लात्ती हानेर भौतिक क्षति पुर्‍याएका थिए ।

उनले आवश्यक अध्यागमन प्रक्रियासमेत पूरा नगरी जबरजस्ती अघि बढेका थिए। सामाजिक सञ्जालमा सार्वजनिक भिडियोमा उनले आफ्नो यात्रा अनुमतिपत्र भुइँमा पछारेको र ढोकामा लात्ती हान्दै जबरजस्ती अगाडि बढेको देखिन्छ ।

घटनालगत्तै सुरक्षाकर्मीले उनलाई नियन्त्रणमा लिएका थिए । सरकारी सम्पत्ति सरकारी नोक्सान पुर्‍याएको आरोपमा उनलाई १५ हजार डलरसम्म जरिवाना, तीन वर्षसम्मको जेल सजाय वा दुवै हुन सक्ने कानुनी प्रावधान छ ।

यसका साथै ड्युटीमा रहेका अधिकारीहरूलाई दुर्व्यवहार गरेको अभियोग पनि उनीमाथि लागेको छ। यो अभियोग प्रमाणित भएमा थप एक वर्षको जेल सजाय वा ६ सय डलर जरिवाना हुन सक्छ।

थाइल्यान्डका अधिकारीहरूले ती व्यक्तिको भिसा रद्द गरिसकेका छन् र उनलाई सधैँका लागि कालोसूचीमा राखेका छन् । कानुनी प्रक्रिया पूरा भएपछि उनलाई आफ्नै देश फिर्ता पठाइनेछ ।

थाइल्यान्डको गृह मन्त्रालयले स्थानीय बासिन्दालाई धम्क्याउने वा सार्वजनिक ठाउँमा अभद्र व्यवहार गर्ने विदेशीहरू विरुद्ध कडा कदम चाल्न निर्देशन दिएको ठीक एक हप्तापछि यो घटना सार्वजनिक भएको हो।