काठमाडौं– चालु आर्थिक वर्ष (आव)को १० महिनामा नेपालमा झण्डै १७ खर्बको वस्तु आयात भएको छ भने २ खर्ब बढीको वस्तु निर्यात भएको छ । बिहीबार भन्सार विभागले सार्वजनिक गरेको तथ्यांकले चालु आवको १० महिनामा नेपालमा १६ खर्ब ९२ अर्ब ६४ करोड २६ लाख ४० हजार रुपैयाँ बराबरको वस्तु आयात भएको देखाएको हो ।

जुन आयात गत आवको सोही अवधिको तुलनामा १४.८२ प्रतिशतले धेरै हो । गत आवको सो अवधिमा नेपालमा १४ खर्ब ७४ अर्ब १८ करोड ८२ लाख ९७ हजार रुपैयाँ बराबरको भएको थियो । त्यस्तै, चालु आवको समीक्षा अवधिमा नेपालबाट २ खर्ब ४८ अर्ब ९६ करोड २६ लाख ७० हजार रुपैयाँ बराबरको वस्तु निर्यात भएको छ ।

जुन निर्यात गत आवको सोही अवधिको तुलनामा १४.२५ प्रतिशतले धेरै हो । गत आवको सोही अवधिमा नेपालबाट २ खर्ब १७ अर्ब ९१ करोड १० लाख ५९ हजार रुपैयाँ बराबरको वस्तु निर्यात भएको थियो । आयातमा डिजेल अगाडि, निर्यातमा सोयाबिन विभागको तथ्यांकअनुसार समीक्षा अवधिमा नेपालमा सबैभन्दा धेरै अर्थात् १ खर्ब ३० अर्ब ९३ करोड ७४ लाख १४ हजार रुपैयाँ बराबरको डिजेल आयात भएको छ ।

त्यस्तै, सो अवधिमा सबैभन्दा धेरै अर्थात् १ खर्ब १ अर्ब २६ करोड ८८ लाख १५ हजार रुपैयाँ बराबरको सोयाबिन तेल तथा कच्चा पदार्थ निर्यात भएको छ । समीक्षा अवधिमा नेपालमा १ खर्ब ६ अर्ब ८२ करोड २८ लाख १८ हजार रुपैयाँ बराबरको सोयाबिन तेल तथा सो को कच्चा पदार्थ, ५८ अर्ब ६३ करोड ९९ लाख १८ हजार रुपैयाँ बराबरको पेट्रोल र ४८ अर्ब ५ करोड २२ लाख ३० हजार रुपैयाँ बराबरको फलामको कच्चा पदार्थ आयात भएको छ ।

साथै, सो अवधिमा नेपालबाट ११ अर्ब ४२ करोड ४४ लाख ४५ हजार रुपैयाँ बराबरको ठूलो अलैँची, ८ अर्ब ४८ करोड ३० लाख ६६ हजार रुपैयाँ बराबरको कार्पेट तथा टेक्सटाइल, ७ अर्ब ४१ करोड १५ लाख ६१ हजार रुपैयाँ बराबरको सूर्यमुखी तेल तथा सो को कच्चा पदार्थ आयात भएको विभागले जनाएको छ ।