काठमाडौं- भारत र दक्षिण कोरियाले आफ्नो रणनीतिक साझेदारीलाई थप सुदृढ बनाउँदै वृहद सहकार्य गर्ने घोषणा गरेका छन्। ऊर्जा, खनिज, सेमिकन्डक्टर र जहाज निर्माण जस्ता विभिन्न औद्योगिक क्षेत्रमा सहकार्य बढाउँदै दुई देशले सन् २०३० सम्म द्विपक्षीय व्यापार ५० अर्ब डलर पुर्‍याउने लक्ष्य राखेका छन्। व्यापारका साथै दुवै देशले सांस्कृतिक आदानप्रदानलाई पनि विस्तार गर्ने भएका छन्।

दक्षिण कोरियाली राष्ट्रपति ली जे म्युङको भारत भ्रमणका क्रममा भारतीय प्रधानमन्त्री नरेन्द्र मोदीले सोमबार उनको भव्य स्वागत गरे । प्रधानमन्त्री मोदीले यस भ्रमणले दुई देशबीचको विश्वासिलो सम्बन्धलाई आधुनिक र भविष्यमुखी साझेदारीमा बदल्ने बताए । उनले चिप्सदेखि जहाजसम्म र प्रविधिदेखि ऊर्जासम्मका हरेक क्षेत्रमा सहकार्यका नयाँ अवसरहरू सिर्जना गरिने उल्लेख गरे ।

दुई नेताबीचको यो छलफलले दुवै देशको प्रगति र समृद्धिलाई सुनिश्चित गर्ने विश्वास लिइएको छ। दक्षिण कोरियाली राष्ट्रपतिको यो भ्रमणलाई दुई देशबीचको आर्थिक र प्राविधिक सम्बन्धमा एउटा नयाँ इँटा थपिएको रूपमा हेरिएको छ। यसले विशेष गरी प्रविधि र दक्ष जनशक्ति आदानप्रदानमा ठुलो सहयोग पुग्ने अपेक्षा गरिएको छ।