काठमाडौं- सरकारले साउदी अरबको सयबाह क्षेत्रमा खसालिएको ड्रोनको भग्नावशेष लागेर एक जना नेपाली नागरिकको ज्यान गएको घटनाप्रति गहिरो दुःख व्यक्त गरेको छ । परराष्ट्र मन्त्रालयले बिहीबार सामाजिक सञ्जालमार्फत विज्ञप्ति जारी गर्दै घटनामा नेपाली नागरिकको ज्यान गएकोमा दुःख व्यक्त गर्दै मृतकका शोकसन्तप्त परिवारजनप्रति हार्दिक समवेदना प्रकट गरेको छ ।

साथै, घटनामा घाइते भएकाहरूको शीघ्र स्वास्थ्य लाभको कामना पनि गरिएको छ । परराष्ट्र मन्त्रालयले सर्वसाधारण र अत्यावश्यक पूर्वाधारहरूलाई लक्षित गरी गरिने कुनै पनि किसिमका आक्रमणको कडा शब्दमा भर्त्सना गर्ने नेपालको अडानलाई पुनः दोहोर्‍याएको छ ।

मन्त्रालयद्वारा जारी विज्ञप्तिमा कुनै पनि विवादको समाधान हिंसाबाट नभई संवाद, वार्ता र कूटनीतिक पहलका माध्यमबाट शान्तिपूर्ण रूपमा गरिनुपर्ने धारणा व्यक्त गरिएको छ । साउदी अरामकोद्वारा सञ्चालित सायबाह तेल क्षेत्र दक्षिणपूर्वी साउदी अरेबियाको रुब अल खाली मरुभूमिमा अवस्थित छ।

पछिल्लो समय खाडी क्षेत्रमा बढ्दो क्षेत्रीय तनावका कारण निर्माण, सुरक्षा, आतिथ्य र ऊर्जा जस्ता विभिन्न क्षेत्रमा कार्यरत नेपाली श्रमिकहरूको सुरक्षाप्रति थप चिन्ता बढाएको छ। नेपालले अन्तर्राष्ट्रिय विवादहरूलाई सधैँ कूटनीतिक माध्यमबाट समाधान गर्नुपर्ने र नागरिक तथा नागरिक पूर्वाधारको रक्षा गरिनुपर्नेमा जोड दिँदै आएको छ।

We are deeply saddened by the tragic loss of a Nepali citizen in a debris falling from intercepted drone attackted at Saudi Aramco’s Saybah Oil field yesterday. We extend our heartfelt condolences to the bereaved family and wish for the speedy recovery of all those injured. Nepal reitirates its unequivocal condemnation to all attacks targeted at civilians and critical infrastructures. Reaffirming our principled position, Nepal continues to call for the peaceful resolution of disputes including through dialogue, negotiation, and diplomatic engagement.

— MOFA of Nepal 🇳🇵 (@MofaNepal) October 22, 2026