काठमाडौं । नेपाली कांग्रेसकी उपसभापति पुष्पा भुसालले पूर्वसभापति शेरबहादुर देउवा पार्टीको सम्मानित अभिभावक बन्नुपर्ने बताएकी छिन् ।

मंगलबार अर्घखाँचीको सन्धीखर्कमा आयोजित कार्यक्रममा सम्बोधन गर्दै  उनले देउवाको योगदानको कदर गर्न आफूहरू तयार रहेको बताएकी हुन् । ”उहाँको योगदानको कदर गर्दै सम्मानित अभिभावक स्वीकार्न हामी तयार छौँ । उहाँलाई अभिभावक मानेकै कारण अधिवेशनमा सहभागिताका लागि आमन्त्रण गरिएको छ । उहाँको गरिमामय उपस्थितिले पार्टीलाई बलियो बनाउन सहयोग पुर्‍याउँछ,” भुसालले भनिन् । 

विशेष महाधिवेशनपछिको आन्तरिक विवाद र असन्तुष्टिलाई सम्बोधनका लागि  कुनै पनि नेता वा समूहलाई बाहिर नराखिने प्रतिबद्धता उनले व्यक्त गरिन् ।  “महाधिवेशनमा सहभागी हुन नसकेका वा असन्तुष्ट नेताहरूलाई समेट्न विधानका धारा निलम्बन गरेर भए पनि सम्मानजनक स्थान दिइनेछ,”उनले भनिन्।​

उपसभापति भुसालले गगन थापा सर्वसम्मत रूपमा पार्टीको सभापतिमा दोहोरिने बताइन् । ”पार्टीका कार्यकर्ता र आम जनताले गगन थापालाई सभापतिको भूमिकामा हेर्न चाहेका छन्,” भुसालले भनिन्, “सभापतिमा थापा सर्वसम्मत चयन हुनुहुन्छ। अन्य पदाधिकारी र केन्द्रीय सदस्यमा भने सबै पक्षलाई सम्मानजनक रूपमा समेटेर अघि बढ्नुपर्छ।” 

आफू पनि आगामी कार्यकालमा पदाधिकारीमै रहेर काम गर्ने इच्छा व्यक्त गरिन्।​  भुसालले १५ औँ महाधिवेशनले पार्टीभित्रका गुट-उपगुटको अन्त्य गर्ने बताइन्। साथै, विधानमा संशोधन गरी ३५ वर्षमुनिका प्रतिनिधिबाट २१ जना केन्द्रीय सदस्य बन्ने व्यवस्था गरिएकाले आगामी नेतृत्वमा युवाहरूको बलियो र निर्णायक सहभागिता रहने उनले उल्लेख गरिन्। अधिकांश वडामा सहमतिबाटै नेतृत्व चयन भएकाले कार्यकर्तामा नयाँ उत्साह छाएको उनको भनाइ थियो।