काठमाडौं- पाकिस्तानका सूचनामन्त्री अत्ताउल्लाह तरारको कार नजिकै गोली प्रहार भएपछि लाहोरमा सुरक्षा सतर्कता बढाइएको छ । पारिवारिक भ्रमणका क्रममा शनिबार लाहोरको डिफेन्स ए क्षेत्रमा मन्त्री तरार यात्रा गरिरहेको बेला यो घटना घटेको हो ।

प्रारम्भिक अनुसन्धानबाट यो आक्रमण मन्त्रीलाई लक्षित गरेर नभएको पाइएको स्थानीय अधिकारीहरूले जनाएका छन् । सञ्चार माध्यमका अनुसार घटना लगत्तै प्रहरीले ओसामा नामक एक संदिग्ध व्यक्तिलाई पक्राउ गरेको छ भने गोली प्रहारमा प्रयोग गरिएको हतियार र गाडी पनि नियन्त्रणमा लिएको छ ।

घटनाबारे स्पष्ट पार्दै मन्त्री तरारले आफ्नो गाडीलाई अर्को एउटा सवारी साधनले ओभरटेक गरेको र सोही गाडीभित्र एक व्यक्तिले पेस्तोल निकालेर हवाइ फायर गरेको बताएका छन् । पक्राउ परेका संदिग्धविरुद्ध फौजदारी मुद्दा दर्ता गरिएको र यस विषयमा थप कानुनी कारबाही अगाडि बढाइएको प्रहरीले जनाएको छ ।