काठमाडौं– नेपाल सरकारको नेतृत्व तथा संयुक्त राष्ट्रसंघको सहकार्यमा संयुक्त राष्ट्रसंघ मानसिक स्वास्थ्य सहयोग कार्यक्रम शुभारम्भ गरिएको छ ।

आगामी तीन वर्षसम्म सञ्चालन हुने यस कार्यक्रमले नेपालको मानसिक स्वास्थ्य प्रणालीलाई सुदृढ बनाउने, गुणस्तरीय मानसिक स्वास्थ्य सेवामा नागरिकको पहुँच विस्तार गर्ने तथा मानसिक स्वास्थ्यसम्बन्धी जनशक्तिको क्षमता अभिवृद्धि गर्ने लक्ष्य राखेको छ ।

कार्यक्रमको प्रत्यक्ष कार्यान्वयन कर्णाली, मधेश र लुम्बिनी प्रदेशमा केन्द्रित हुनेछ । साथै, मानसिक स्वास्थ्यसम्बन्धी सुशासन तथा नीतिगत संरचनालाई बलियो बनाउने, डिजिटल तथा टेलि–मानसिक स्वास्थ्य सेवाको विस्तार गर्ने तथा सार्वजनिक–निजी साझेदारीमार्फत मानसिक स्वास्थ्य सेवाको पहुँच र गुणस्तर सुधार गर्ने उद्देश्य रहेको बताइएको छ ।

कार्यक्रममार्फत मानसिक स्वास्थ्यका क्षेत्रमा दीर्घकालीन तथा प्रणालीगत परिवर्तन ल्याउने अपेक्षा गरिएको छ । विशेषगरी समुदायस्तरमै मानसिक स्वास्थ्य सेवा विस्तार, सेवा प्रदायकहरूको क्षमता विकास तथा नवीन प्रविधिको प्रयोगलाई प्राथमिकता दिइने जनाइएको छ ।

नेपालस्थित स्विस दूतावासको सहयोगमा सञ्चालन हुने यस कार्यक्रम स्वास्थ्य तथा जनसंख्या मन्त्रालयको नेतृत्वमा कार्यान्वयन हुनेछ । संयुक्त राष्ट्र जनसंख्या कोष , युनिसेफ नेपाल  र विश्व स्वास्थ्य संगठन नेपाल (डब्लुएचओ) ले कार्यक्रम कार्यान्वयनमा सहकार्य गर्नेछन् ।

सरकार तथा संयुक्त राष्ट्रसंघका निकायहरूले मानसिक स्वास्थ्यलाई सार्वजनिक स्वास्थ्यको महत्त्वपूर्ण प्राथमिकताका रूपमा स्थापित गर्दै सेवाको पहुँच र गुणस्तर सुधार गर्न कार्यक्रमले महत्त्वपूर्ण योगदान पुर्‍याउने विश्वास व्यक्त गरेका छन् ।