काठमाडौं- नेपाली कांग्रेसका सभापति गगनकुमार थापाले राष्ट्रिय स्वतन्त्र पार्टी (रास्वपा) ले स्थापनाको छोटो समयमै नेपाली राजनीतिमा असाधारण जनमत र समर्थन प्राप्त गरेको भन्दै प्रशंसा गरेका छन् । रास्वपाको पहिलो महाधिवेशनका अवसरमा आफ्नो धारणा राख्दै सभापति थापाले पार्टी स्थापनाको चार वर्षभित्रै रास्वपाले जुन प्रकारको जनसमर्थन हासिल गरेको छ, त्यो निकै लोभलाग्दो र नेपाली राजनीतिका लागि विशिष्ट रहेको उल्लेख गरे ।

सम्बोधनका क्रममा सभापति थापाले नेपालको राजनीतिक इतिहास र विगतका अनुभवहरूलाई स्मरण गराउँदै नयाँ शक्तिलाई सत्ता र शक्तिको उन्मादबाट जोगिन विशेष आग्रह समेत गरे । नेपालको इतिहासमा यसअघि पनि विभिन्न राजनीतिक दलहरूले तीन-चार पटक यस्तै उत्साहजनक र ठूलो जनमत प्राप्त गरेको स्मरण गर्दै उनले हरेक पटक त्यो जनमत दुर्घटनामा परेको तितो यथार्थ औँल्याए ।

विगतमा जुन-जुन दलले त्यस्तो बलियो जनमत पाए, उनीहरूका नेताहरूबीच आपसी अहंकारको टकराव सुरु भएको र अर्कोतर्फ जनमत प्राप्त गरिसकेपछि शक्तिको पनि एउटा सीमा हुन्छ भन्ने कुरालाई बिर्सिएर सत्ताको उन्माद चढेका कारण विगतका ती अवसरहरू गुम्न पुगेको उनको विश्लेषण छ ।

पार्टीहरूमा सत्ता र शक्तिको घमण्ड बढ्दै जाँदा नेतृत्वबाट अलोकतान्त्रिक व्यवहारहरू प्रदर्शन हुन थाल्ने र अन्ततः जनताले दिएको मत तथा भरोसा दुर्घटनामा पर्ने गरेको थापाको भनाइ थियो । उनले रास्वपाले विगतका राजनीतिक दलहरूले गरेका त्यस्ता गल्तीहरूबाट पाठ सिक्नुपर्नेमा जोड दिए ।

थापाले नयाँ राजनीतिक शक्तिका रूपमा उदाएको रास्वपाले आगामी दिनमा नेताहरूबीचको अहंकारको टकराव र सत्ताको उन्माद जस्ता दुवै प्रतिकूल अवस्थाको सामना गर्नु नपरोस् भनी कामना गर्दै पार्टीको प्रथम महाधिवेशनको सफलताको शुभेच्छा प्रकट गरे ।