काठमाडौं- भारतले गत आर्थिक वर्षमा वस्तु निर्यातमा नयाँ कीर्तिमान कायम गरेको छ । अघिल्लो वर्षको तुलनामा १ प्रतिशतले वृद्धि भई वस्तु निर्यात ४४१.८ अर्ब डलर पुगेको छ । यद्यपि, सुन र चाँदीको आयातमा भएको ठूलो वृद्धिका कारण कुल आयात ७.५ प्रतिशतले बढेर ७७५ अर्ब डलर पुगेपछि व्यापार घाटा ३३३ अर्ब डलर पुगेको छ ।

मार्च महिनामा निर्यातमा ७.६ प्रतिशतको गिरावट आएकाले समग्र तथ्याङ्क केही प्रभावित भएको देखिएको छ। तर, सोही महिनामा आयात पनि ६.४ प्रतिशतले घटेपछि व्यापार घाटा नौ महिनायताकै न्यून बिन्दुमा झरेको छ। सेवा क्षेत्रसहितको समग्र निर्यातलाई हेर्दा ४ प्रतिशतको वृद्धिसहित ८६०.१ अर्ब डलरको नयाँ उचाइ कायम भएको छ, जबकि कुल आयात ९२० अर्ब डलरको हाराहारीमा रहेको छ।

वाणिज्य तथा उद्योग मन्त्री पीयूष गोयलले सामाजिक सञ्जालमार्फत भारतले निर्यातमा ऐतिहासिक सफलता हात पारेको भन्दै खुसी व्यक्त गरेका छन्। उनले विश्वव्यापी प्रतिकूल परिस्थितिका बाबजुद पनि ८६० अर्ब डलरको निर्यात लक्ष्य भेट्टाउनुले भारतीय अर्थतन्त्रको मजबुती र विश्व बजारमा बढ्दो प्रभावलाई झल्काएको बताएका छन् ।