तेहरान- इरानी नेतृत्वले वार्ता अघि नबढेको अवस्थामा अमेरिकाले जुनसुकै बेला आक्रमण गर्न सक्ने शंका व्यक्त गरेको छ।

इरानका न्यायपालिकाका प्रमुखले एक चेतावनी दिँदै अमेरिका थप आक्रमण गर्ने तयारीमा रहेको बताएका छन्।

इरानका न्यायपालिकाका प्रमुख गुलामहुसैन मोहसेनी एजेईले अमेरिकाले देशमाथि नयाँ आक्रमण गर्न सक्ने बताएका छन्।

इरानी समाचार एजेन्सी फार्सका अनुसार उनले तेहरानलाई पूर्ण रूपमा तयारी अवस्थामा रहन आवश्यक रहेको बताएका छन्।

उनले धेरै उच्चस्तरीय इरानी अधिकारीहरू मारिए पनि अमेरिका अझै आफ्नो युद्धको लक्ष्य हासिल गर्न सफल नभएको पनि बताए ।

उता इरानको संयुक्त सैन्य कमाण्डले मंगलबार अमेरिकाको कुनै पनि धम्कीको कडा जवाफ दिन तयार रहेको जनाएको छ।

खातम अल-अनबिया केन्द्रीय मुख्यालयका कमाण्डर अली अब्दोल्लाहीले इरानका सशस्त्र बल एकजुट रहेको बताउँदै शत्रुको कुनै पनि कदम वा धम्कीको तुरुन्त, निर्णायक र कडा जवाफ दिन तयार रहेको बताए।

उनले इरानका लगातार मिसाइल र ड्रोन आक्रमणकै कारण अमेरिका र इजरायल युद्धविरामको माग गर्न बाध्य भएको दाबी पनि गरे।

इन्टरनेट ५३ दिनदेखि बन्द

इरानमा इन्टरनेट ठप्प हुने क्रम ५३औँ दिनमा पुगेको छ। इन्टरनेट निगरानी गर्ने संस्था नेटब्लक्सका अनुसार सरकारले इन्टरनेट पूर्ण रूपमा खुला नगरी केही व्यक्ति र व्यवसायलाई मात्रै सीमित पहुँच दिएको छ।

देशका अधिकांश जनता अझै पनि ग्लोबल इन्टरनेटबाट वञ्चित छन्। नेटब्लक्सले सरकार टियर सिस्टम अर्थात् विभिन्नस्तरमा इन्टरनेट पहुँच दिने व्यवस्था लागू गरिरहेको बताएको छ।

यसको अर्थ केही विशेष व्यक्ति वा संस्थाले मात्रै इन्टरनेट प्रयोग गर्न पाइरहेका छन्, तर आम नागरिकले भने पाएका छैनन्। यसले ठूला असर देखिएका छन् ।

सर्वसाधारणको दैनिक जीवनमा गम्भीर प्रभाव परेको छ । व्यापार तथा अर्थतन्त्रमा निरन्तर क्षति भइरहेको छ । संस्थाका अनुसार यस्तो डिजिटल सेन्सरशिपको असर समयसँगै झन् गम्भीर बन्दै गएको छ।