काठमाडौं- इरानको मुख्य आणविक केन्द्र नटान्जमा पुनः आक्रमण भएको छ । इरानविरुद्ध इजरायल र अमेरिकाले सुरु गरेको युद्धको पहिलो हप्तामा पनि यस क्षेत्रमा हमला भएको थियो ।

इरानी आणविक ऊर्जा संगठनका अनुसार ‘शहीद अहमदी रोशन’ केन्द्रमा अमेरिका र इजरायलले ‘आपराधिक आक्रमण’ गरेका हुन् । यो आक्रमणबाट परमाणु अप्रसार सन्धि र अन्तर्राष्ट्रिय सुरक्षा नियमहरूको उल्लंघन भएको इरानले बताएको छ ।

यद्यपि समाचारमा जनाइए अनुसार उक्त केन्द्रबाट कुनै पनि रेडियोधर्मी पदार्थ चुहावट भएको देखिएको छैन ।

राजधानी तेहरानबाट २२० किलोमिटर टाढा रहेको यो केन्द्रमा सन् २०२५ जुनमा भएको १२ दिने युद्धमा पनि इजरायल र अमेरिकाले हमला गरेका थिए ।

अहिले जारी युद्ध रोकिने कुनै संकेत देखिएको छैन। इजरायलले शनिबार बिहान पनि इरानले क्षेप्यास्त्र प्रहार गरेको जनाएको छ। यता साउदी अरबले आफ्नो पूर्वी क्षेत्रमा रहेका तेल खानीतर्फ आएका २० वटा ड्रोनहरू खसालेको दाबी गरेको छ ।