काठमाडौं – श्रीलङ्काले बङ्गालको खाडी क्षेत्रमा आतङ्कवाद, लागूऔषध तस्करी, मानव बेचबिखन र साइबर अपराध नियन्त्रणका लागि क्षेत्रीय सुरक्षा सहकार्य सुदृढ गर्नुपर्नेमा जोड दिएको छ ।

श्रीलङ्काका सार्वजनिक सुरक्षा तथा संसदीय मामिलामन्त्री आनन्द विजेपालाले अक्टोबर १३ मा भारतको नयाँदिल्लीमा आयोजित पहिलो बिमस्टेक गृहमन्त्रीस्तरीय बैठकमा समयमै सूचना आदानप्रदान र सदस्य राष्ट्रबीच समन्वय आवश्यक रहेको बताए।

भारतका गृहमन्त्री अमित शाहको अध्यक्षतामा भएको बैठकमा बङ्गलादेश, भुटान, भारत, म्यान्मा, नेपाल, श्रीलङ्का र थाइल्यान्डका प्रतिनिधि सहभागी थिए । बैठकले क्षेत्रीय सुरक्षा सहकार्यलाई थप प्रभावकारी बनाउने उद्देश्यसहित दिल्ली घोषणापत्र स्वीकृत गरेको भारतस्थित श्रीलङ्का उच्चायोगले जनाएको छ ।

घोषणापत्रमा आतङ्कवाद, लागूऔषध तस्करी, मानव बेचबिखन, सम्पत्ति शुद्धीकरण र सङ्गठित अपराध नियन्त्रणका लागि सूचना आदानप्रदान, कानुनी सहायता, सुपुर्दगी तथा संयुक्त कारबाहीलाई प्राथमिकता दिइएको छ ।

यसअघि अक्टोबर १२ मा आयोजित वरिष्ठ अधिकारीहरूको बैठकमा लागूऔषध नियन्त्रण, आतङ्कवादी गतिविधिमा हुने वित्तीय सहयोग रोकथाम तथा विपद् व्यवस्थापनका विषयमा छलफल भएको थियो ।

मन्त्री विजेपालाले क्षेत्रीय सुरक्षा सहकार्यले नागरिकको जीवन सुरक्षित बनाउनुका साथै बङ्गालको खाडी क्षेत्रमा स्थिरता, विकास र समृद्धि प्रवर्द्धन गर्न सहयोग पुग्ने बताए।