काठमाडौँ – परराष्ट्रमन्त्री शिशिर खनालले देशका विभिन्न क्षेत्रमा आएको विनाशकारी बाढी र पहिरोजस्ता विपद्का बाबजुद पनि परिवार र इष्टमित्रहरूसँग खुसीका साथ विजयादशमी मनाउन आग्रह गरेका छन्।

बडादसैँका अवसरमा शुभकामना सन्देश जारी गर्दै परराष्ट्रमन्त्री खनालले पछिल्लो समय देशमा आएको प्राकृतिक विपत्तिले नागरिकमा गहिरो पीडा र कठिनाइ ल्याएको उल्लेख गरेका छन्।

“पछिल्लो समयमा विभिन्न क्षेत्रमा आएको विनाशकारी बाढी र पहिरोले गहिरो पीडा र कठिनाइहरू ल्याएको छ,” मन्त्री खनालले भनेका छन्, “यी विपद् र चुनौतीहरूको बावजूद पनि, आफ्नो परिवार, इष्टमित्र र साथीभाइसँग खुसी र उल्लासका साथ यो चाड मनाउन अनुरोध गरिन्छ।”

सुख र दुःख दुवैलाई जीवनको सहज अङ्गका रूपमा स्वीकार गर्नु नै नेपाली समाज र संस्कृतिको अभिन्न पहिचान रहेको उल्लेख गर्दै उनले स्वदेश तथा विदेशमा रहेका सम्पूर्ण नेपालीहरूमा बडादसैँको हार्दिक शुभकामना व्यक्त गरेका छन्।