काठमाडौं – पूर्वप्रधानमन्त्री डा. बाबुराम भट्टराईले राजधानीको केन्द्रमा युवाहरूले आत्मदाहको प्रयास गर्नु गम्भीर चिन्ताको विषय भएको बताएका छन्।

सोमबार सामाजिक सञ्जालमार्फत उनले गणेश नेपाली र पछिल्लो समय दावा लामाले आत्मदाहको प्रयास गरेको घटनालाई राज्यप्रणाली तथा मुलुकको आर्थिक–सामाजिक अवस्थाप्रति बढ्दो निराशा र अविश्वासको संकेतका रूपमा लिनुपर्ने बताएका हुन् ।

भट्टराईले यस्तो अवस्थालाई राजनीतिक दल तथा सरोकारवालाले गम्भीरतापूर्वक बुझेर आर्थिक–राजनीतिक समस्याको दिगो र संरचनात्मक समाधान खोज्नुपर्नेमा जोड दिएका छन्।

उनले राजनीतिक शक्तिहरूलाई उत्तेजक अभिव्यक्ति र मुठभेडको वातावरण सिर्जना नगर्न पनि आग्रह गरेका छन्। आत्मदाहको बाटो रोज्ने युवाको अवस्थालाई हल्का रूपमा नलिनसमेत उनले सचेत गराएका छन्।