काठमाडौं- करिब छ महिनापछि बसेको नेकपा एमालेको केन्द्रीय कमिटी बैठकमा पार्टी अध्यक्ष केपी शर्मा ओलीले सिन्डिकेट लगाएका छन् । कसैले बोल्दा समेत अध्यक्षको अनुमति लिनुपर्ने र रोकिँदा पनि ओलीको अनुमतिमा रोकिनुपर्ने भएपछि कम्युनिस्ट पार्टीमा वाक स्वतन्त्रता हनन भएको भन्दै नेताहरू तनावमा देखिएका हुन् । अध्यक्ष ओली र महासचिव शंकर पोखरेलबीच दुरी बढेपछि अहिले ओलीले नै केन्द्रीय कमिटी बैठकलाई सञ्चालन गरिरहेका छन् ।

उनले केन्द्रीय कमिटी बैठकको सुरुवाती अवस्थामा सम्बोधनका क्रममा पनि अध्यक्षको अनुमति लिएर बोल्नुपर्ने कुरा राखेका थिए । बैठकमा ओलीका बारेमा बोल्न थालेपछि केन्द्रीय कमिटी सदस्य कृष्ण गोपाल श्रेष्ठलाई रोकिएको थियो । त्यसपछि श्रेष्ठले काहीँ नभएको जात्रा यहीँ मात्रै भएको भन्दै आक्रोशित बनेका थिए ।

उनलाई स्वयंसेवकले समेत रोकेपछि स्वयंसेवकलाई तिमीहरू को हो ? भन्दै थर्काएको बैठकमा उपस्थित नेताहरुले जानकारी दिएका छन् । अहिले ओलीको कार्यशैलीलाई लिएर केन्द्रीय कमिटी बैठकमा नेताहरू तीव्र असन्तुष्ट देखिएका छन् । ओलीको अनुमतिबेगर हलचल गर्न नपाएपछि नेताहरूले आफ्नो स्वतन्त्रता र पार्टीको नीति सिद्धान्त विपरीत काम भएको आरोप लगाइरहेका छन् ।

आजको बैठकमा अध्यक्ष आफैंले नेताहरूलाई कडाइ गरेपछि यस्तो बैठक काहीँ नभएको भन्दै कृष्ण गोपाल लगायतका नेताहरु असन्तुष्ट रहेको देखिन्छ । अरु शीर्ष नेताहरू रघुजी पन्त, विष्णु रिमाल लगायतले पनि असन्तुष्टि व्यक्त गरिरहेका छन् । पार्टीका युवा पंक्तिले समेत शीर्ष नेताहरूलाई ओलीको कार्यशैलीलाई लिएर विभिन्न हाउभाउ प्रस्तुत गरिरहेको बैठकमा सहभागी एक नेताले जानकारी दिए ।

‘अध्यक्षज्यूले पूरै सिन्डिकेट लगाउनुभएको छ । बोल्ने बेला पनि उहाँको पर्मिसन लिनुपर्ने र अन्त्य गर्दा पनि उहाँले रोक्न भनेपछि रोकिनुपर्ने अवस्था छ । केही साथीहरुसँग त अध्यक्षज्यूको भनाभनै भयो । यस्तो अवस्था त कहिँ पनि देखिएको थिएन ।’ बैठकबाट ती नेताले भने, ‘अब पनि अध्यक्षज्यू नसुध्रिएपछि हामीले पार्टीमा हार खाने स्थिति छ । त्यसकारण जसरी पनि पार्टीमा नेतृत्व पुनर्गठनको बहसलाई अब व्यापक उठाउनुपर्ने स्थिति आयो ।’