काठमाडौं- नेकपा एमालेका अध्यक्ष केपी शर्मा ओलीले सरकारले आफूविरुद्ध प्रतिशोधपूर्ण व्यवहार गरेको आरोप लगाएका छन्। सोमबार सुरु भएको एमाले केन्द्रीय कमिटी बैठकलाई सम्बोधन गर्दै ओलीले निर्वाचनको प्रक्रियामाथि समेत असन्तुष्टि जनाएका छन्।

ओलीले आफूविरुद्ध निरन्तर प्रहार भइरहेको गुनासो गर्दै सरकार, सामाजिक सञ्जाल र सञ्चारमाध्यमबाट आफूलाई निशाना बनाइएको बताए।

‘अरू पार्टीभन्दा हामीमाथि प्रहार भइरहेको छ। पार्टीको अध्यक्ष र नेतृत्वको हैसियतले अझ ममाथि बढी प्रहार भइरहेका छन्। सामाजिक सञ्जाल होस् या मिडिया, जसले पनि मलाई निरन्तर प्रहार गरिरहेका छन्,’ ओलीले भने।

उनले आफूलाई बिना कसुर पक्राउ गरिएको दाबी गर्दै सरकारको व्यवहार प्रतिशोधपूर्ण रहेको आरोप लगाए।

‘प्रतिशोधपूर्ण व्यवहार र बिना कसुर गिरफ्तारी गरियो। देशलाई नै अरर्याएर शान्तिपूर्ण चुनाव गरियो,’ उनले भने।

ओलीले निर्वाचनका बेला पार्टी नेताहरू एकताबद्ध भएर अघि बढ्नुपर्नेमा एमालेभित्रैबाट पार्टीमा समस्या उत्पन्न गर्ने गतिविधि भएको आरोप पनि लगाए।

‘यस्तो बेलामा पार्टी नेताहरू एकताबद्ध हुनुपर्थ्यो तर हामीभित्रकै केही नेताहरू पार्टीमा उतण्ड मच्चाउनतर्फ लागे। यसले अझ समस्या गर्‍यो,’ उनले भने।

उनले पार्टीका नेता तथा कार्यकर्ताबीच एक मन र एकचित्त भएर अघि बढ्नुपर्नेमा आफ्नै नेताहरूबाट आफूहरूमाथि विभिन्न आक्षेप लगाउने काम भएको बताए।