काठमाडौं – भारतीय सुपरस्टार गायक शान्तनु मुखरजी (शान) काठमाडौं आएर यहाँको भ्रमण तालिकाबारे दर्शकहरूलाई जानकारी दिएका छन् ।

गायक शान क्लब नोभामा शनिबार कन्सर्टका लागि आएका हुन् । सञ्चारकर्मीहरूसँगको भेटघाटमा उनले आफ्नै स्वरको नेपाली गीत ‘मुसुमुस हाँसिदेउ न लै लै’को सानो अंश गाएर सुनाए ।

साथै, भ्रमणको मुख्य उद्देश्यलाई प्रचार गर्न उनले नेपाली भाषाबाटै सन्देश प्रवाह गरे । उनले नेपाली भाषामै दर्शकहरूलाई आग्रह गरे, ‘भोलि क्लब नोभामा भेटौँला ।’

शानले शनिबार उक्त क्लबमा सांगीतिक प्रस्तुती दिनेछन् । उनले भने, ‘४० वटा गीत गाउने योजना छ । ननस्टप गाउने हो । मेरो रोमान्टिक मात्रै होइन डान्सिङ गीतहरू पनि छन् । हिन्दी-नेपाली गीत गाउने हो । जति बेलासम्म गाउन दिन्छ गाउने हो । सोढे दुई घण्टा जति ।’

शान १५ वर्षपछि नेपाल आएका हुन् । ‘काठमाडौंमा के के गर्ने योजना छ ?’ भन्ने प्रश्नमा उनको जवाफ थियो, ‘पशुपतिनाथ मन्दिरमा जानु छ । काठमाडौंका चर्चित ठाउँहरूमा जानु छ । काठमाडौं सुन्दर सहर हो । नेपाली खान खाने हो, मःमः खाने हो ।’