बाँके– बाँकेमा एक महिनाको अवधिमा ३६ वटा आर्थिक अपराधका मुद्दा दर्ता भएका छन् । जिल्ला प्रहरी कार्यालय बाँकेका अनुसार बैंकिङ कसुरका १९, ठगीका १४, सहकारी रकम हिनामिना एक तथा नेपाल राष्ट्र बैंकअन्तर्गतका कसुरका दुई मुद्दा रहेका छन् । 

यस्तै, अपराध अनुसन्धान तथा नियन्त्रणतर्फ कुल १४४ मुद्दा दर्ता भएका छन् । तीमध्ये जघन्य तथा गम्भीर अपराधका नौ मुद्दा रहेको जिल्ला प्रहरी कार्यालयका प्रहरी नायब उपरीक्षक प्रतितसिंह राठौरले जानकारी दिए । उनका अनुसार सामान्य अपराधका ८४ तथा महिला, बालबालिका र ज्येष्ठ नागरिकसम्बन्धी १५ मुद्दा दर्ता भएका छन् ।

प्रहरीले चालु मुद्दाका प्रतिवादीमध्ये १२६ जनालाई पक्राउ गरेको छ । फैसला कार्यान्वयनतर्फ ८० जनालाई पक्राउ गरिएको प्रहरी नायब उपरीक्षक राठौरले बताए। महिला, बालबालिका तथा ज्येष्ठ नागरिकतर्फ १०५ उजुरी परेकामा १०३ वटा फछ्र्योट भएका छन् । घरेलु हिंसातर्फ ६३ वटा मुद्दा दर्ता भएकामा ६१ वटा मिलापत्र गरिएको छ भने बाँकीलाई अदालत पठाइएको छ ।

प्रहरीका अनुसार एक महिनामा ८४ वटा दुर्घटना भएका छन् । दुर्घटनामा परी तीन जनाको मृत्यु, २३ जना गम्भीर घाइते र ११९ जना सामान्य घाइते भएका छन् । राजस्व चुहावट तथा भन्सार छलीतर्फ २१ लाख १४ हजार ७०७ बराबरको रकम तथा दुई जना व्यक्ति र पाँच सवारीसाधन बरामद गरिएको प्रहरीले जनाएको छ ।
 
प्रहरीले विपद् व्यवस्थापन, अवैध मदिरा नियन्त्रण, प्राकृतिक सम्पदा दोहन नियन्त्रण, अवैध पशु चोरी–पैठारी नियन्त्रण तथा अवैध वन पैदावार चोरी–निकासी नियन्त्रणतर्फ पनि विभिन्न उपलब्धि हासिल गरेको जनाएको छ ।