काठमाडौं- आईसीसी विश्वकप क्रिकेट लिग–२ अन्तर्गत नामिबियाविरुद्धको खेलमा नेपालले खराब प्रदर्शन गरेको छ । नेदरल्याण्ड्सको उट्रेख्टमा जारी खेलमा नेपालले दिएको १५८ रनको लक्ष्य पछ्याएको नामिबियाले सम्हालिएर ब्याटिङ गरिरहेकोे छ ।

ताजा अवस्थामा नामिबियाले १४ ओभरमा एक विकेट गुमाउँदै ६२ रन जोडेको छ । नन्दन यादवले नेपालको एक मात्रै विकेट लिएका छन् । नामिबियाका माइकल भान लिङ्गेनले सर्वाधिक ३८ रन बनाएका छन् । ३९ बलको सामना गरेका उनले चार चौका प्रहार गरेका छन् ।

त्यसैगरी, यान फ्राइलिङ्कले २६ बलमा १८ रन जोडेका छन् । त्यस्तै, अलेक्जाण्डर बुसिङ भोल्चिेङ्कले २१ बलमा दुई रन बनाउँदै आउट भए । यसअघि टस हारेर पहिले ब्याटिङ गरेको नेपालले पहिलो इनिङमा ४६ ओभर ५ बलमा सबै विकेट गुमाउँदै १५७ रन बनायो ।

नेपालका लागि कप्तान रोहित पौडेलले ३१ रन बनाए । त्यस्तै, दीपेन्द्रसिंह ऐरीले ५१ बलमा ३० रन जोडे । करण केसीले १८ रन जोड्दा आशिफ शेख र सोमपाल कामीले क्रमशः १६ र १५ रन बनाए ।

ओपनर कुशल भुर्तेल दुई रन बनाएर आउट भए भने सन्दीप लामिछाने र नन्दन यादवले समान एक रन बनाए । आरिफ शेखले खाता खाल्न पाएनन् ।

नामिबियाका लागि जोनाथन जोहान्नेस स्मिटले सर्वाधिक ६ विकेट लिए भने ज्याक ब्रासेल र बर्नार्ड स्कोल्जले समान दुई विकेट झारे ।