काठमाडौं- प्रदेश सरकारमा कुन गठबन्धन अगाडि बढाउने भन्ने अन्योल अझै हटेको छैन । यस्तो बेला कोशी प्रदेशमा नेपाली कम्युनिस्ट पार्टी (नेकपा) संसदीय दलका नेता इन्द्रबहादुर आङबोले केन्द्रको निर्णय पर्खिरहेको बताएका छन् ।

कोशीमा अहिले नेपाली काङ्ग्रेस-नेकपा एमाले गठबन्धन सरकारबाट मुख्यमन्त्री हिक्मतकुमार कार्की छन्। यहाँ नेकपा र एमाले मिलेर वाम गठबन्धनको सरकार पनि सजिलै बन्न सक्छ।

तर अझै पनि यहाँ केन्द्रको निर्णय पर्खिरहेको आङबो बताउँछन्। आङबोका अनुसार कोशीको सरकार बनाउन कांग्रेस र एमाले दुवैसँग संवाद भइरहेको छ। तर केन्द्रको निर्णय पर्खिरहेको उनी बताउँछन्।

‘कोशीमा कांग्रेस-एमाले गठबन्धन अगाडि नबढ्ने भनिसकेपछि एमाले-नेकपा या नेकपा-कांग्रेस गठबन्धन अगाडि बढ्न सक्छ’, उनी भन्छन्, ‘तर, केन्द्रको निर्णय नआएसम्म यसै भन्न सकिने अवस्था छैन ।’

उनले कोशीमा मध्यावधि चुनावलाई पनि इन्कार गरे । ‘मध्यावधि हल्ला मात्रै हो। अब स्थानीय र प्रदेश निर्वाचन आउन करिब सात महिना बाँकी छ। त्यस अवस्थामा कहाँ मध्यावधि हुनु ? केन्द्रबाट जस्तो निर्णय आउँछ, त्यसलाई कार्यान्वयन गर्छौँ।’

कोशीमा मध्यवधि निर्वाचन हुने चर्चा चलिरहेको छ। कोशीमा कांग्रेसबाट पूर्वसभापति शेरबहादुर देउवा, नेता डा. शेखर कोइराला र वर्तमान सभापति गगन थापासहित तीन समूहमा कांग्रेस विभाजित छ । त्यसकारण कांग्रेससँग सहकार्य गरेर अगाडि जान नेकपालाई कठिन चुनौती देखिएको छ।