इजिङ- रुसका राष्ट्रपति भ्लादिमिर पुटिनले चीन भ्रमणका क्रममा ऊर्जा सुरक्षा र ‘पावर अफ साइबेरिया-२’ ग्यास पाइपलाइनलाई प्रमुख मुद्दा बनाएका छन्।

चार वर्षदेखि जारी युक्रेन युद्धपछि युरोपमा रुसी ग्यासको माग घट्दा मस्कोले अब चीनमा ऊर्जा निर्यात बढाउने आशा गरेको छ।

रुस र चीनको सम्बन्धलाई अमेरिका-चीन सम्बन्धबाट अलग राख्दै पुटिन र शी चिनफिङको निकटतालाई जोड दिइएको छ।

पुटिन अहिलेसम्म २५ पटक चीन गएका छन् भने दुवै नेताबीच ४० भन्दा बढी भेटवार्ता भइसकेको छ। यो भ्रमणको उद्देश्य दुवै देशबीच रणनीतिक सहयोगलाई थप मजबुत बनाउनु रहेको छ।

पुटिनसँगै व्यवसायी र सरकारी अधिकारीहरूको ठूलो प्रतिनिधिमण्डल पनि चीन पुगेको छ। क्रेमलिनका अनुसार दुवै देशले अर्थव्यवस्था, पर्यटन, शिक्षा लगायत विभिन्न क्षेत्रमा करिब ४० समझौताहरूमा हस्ताक्षर गर्न सक्नेछन्।

पुटिनको मुख्य प्राथमिकता ‘पावर अफ साइबेरिया-२’ ग्यास पाइपलाइन परियोजनालाई अघि बढाउनु हो। युक्रेन युद्धपछि युरोपमा रुसी ग्यास निर्यात लगभग रोकिएको छ।

युद्धको पाँचौं वर्षमा पुगेको रुसलाई नयाँ राजस्व स्रोतको आवश्यकता छ, त्यसैले मस्कोले चीनसँग ऊर्जा साझेदारी बढाउने प्रयास गरिरहेको छ।

तर चीन अहिलेसम्म यो परियोजनाप्रति पूर्ण रूपमा आश्वस्त देखिएको छैन। दुवै देशबीच ग्यासको मूल्यलाई लिएर मतभेद कायमै छ। यसका साथै चीन आफ्नो ऊर्जा आवश्यकताका लागि कुनै एक देशमा मात्रै अत्यधिक निर्भर हुन चाहँदैन।