बेइजिङ- चीनका राष्ट्रपति शी चिनफिङले बेइजिङमा रुसी राष्ट्रपति भ्लादिमिर पुटिनसँगको भेटवार्ताका क्रममा मध्यपूर्वमा तत्काल सबै हिंसा अन्त्य गर्न अपिल गरेका छन्।

उनले खाडी क्षेत्र अहिले युद्ध र शान्तिको बीच अत्यन्त महत्वपूर्ण मोडमा रहेको बताए।

सरकारी समाचार एजेन्सी सिन्ह्वाका अनुसार राष्ट्रपति शीले सबै पक्षलाई तत्काल द्वन्द्व रोक्न र तनाव घटाउन अपिल गरेका छन्।

उनले वर्तमान स्थिति अत्यन्त संवेदनशील रहेको र यदि छिटो नियन्त्रणमा नल्याइए क्षेत्रीय अस्थिरता थप बढ्न सक्ने चेतावनी दिए।

मध्यपूर्वमा इरान र इजराइलबीच बढ्दो तनावपछि विश्वका धेरै देशले संयमता अपनाउन अपिल गरिरहेका छन्। खाडी क्षेत्रमा तनाव बढ्दा वैश्विक ऊर्जा आपूर्ति र अन्तर्राष्ट्रिय व्यापार प्रभावित हुने जोखिम पनि बढेको छ।

पुटिन र शीको भेटमा युक्रेन युद्ध र मध्यपूर्वको पछिल्लो स्थितिबारे पनि छलफल भएको थियो। दुवै देशले वैश्विक मुद्दाहरूमा आपसी समन्वय कायम राख्नेमा जोड दिएका छन्।