काठमाडौं- राष्ट्रिय स्वतन्त्र पार्टी (रास्वपा)को केन्द्रीय समितिको बैठक केन्द्रीय कार्यालय वनस्थलीमा सुरू भएको छ।

रास्वपाका प्रवक्ता मनिष झाका अनुसार बैठक अहिले पौने ४ बजेदेखि सुरू भएको हो । बैठकमा सभापति रवि लामिछाने उपस्थित हुँदा वरिष्ठ नेता वालेन्द्र शाह सहभागी छैनन्।

यस बैठकले संघीय सरकारको मन्त्री बनेकाहरूको ठाउँमा नयाँ पार्टी जिम्मेवारी तोक्न लागेको छ। बालेन काठमाडौंमा मेयर हुँदा सहयोगी रहेका भूपदेव शाहलाई महामन्त्री बनाउने तयारी भएको छ ।

उक्त बैठकमा अनिवार्य उपस्थितिका लागि रास्वपाले पार्टीका पदाधिकारी एवम् सदस्यलाई भनेको छ ।

यसअघि आइतबार बसेको सचिवालय बैठकमा प्रतिनिधिसभा सदस्यको सङ्गठनात्मक जिम्मेवारी र संसदीय दलका लागि प्राविधिक सहायता एवम् ‘लेवी’लगायत विषयमा पनि छलफल भएको थियो । यस बैठकले सचिवालयका प्रस्ताव अनुमोदन गर्ने छ ।  

आइतबारको सचिवालय बैठकमा जिल्ला अधिवेशन कार्यविधि, केन्द्रीय आयोग, सल्लाहकार परिषद्, सङ्घीय नेतृत्व मञ्च र विभागको मनोनयन, महाधिवेशन कार्यविधि मस्यौदा समिति गठनलगायत विषयमा छलफल भएको थियो ।