काठमाडौं– काठमाडौंको चक्रपथको दोस्रो खण्ड (कलंकी–महाराजगञ्ज) विस्तारका लागि नेपाल र चीनबीच सम्झौता भएको लामो समय बितिसक्दा पनि काम अघि बढ्न सकेको छैन । निर्माण कार्य सुरु नहुँदा लामो समय देखि स्थानीयवासी वर्षातमा हिलो र हिउँदमा धुलोको समस्या झेल्न बाध्य छन् ।

यो खण्ड विस्तारका लागि २०७५ सालमै सम्झौता भएको थियो। दुई देशका प्रतिनिधिबीच सडक विस्तारमा सहयोगसम्बन्धी पत्रमा हस्ताक्षर गरिएको थियो, जसमा ८.२ किलोमिटर लामो कलंकी–महाराजगञ्ज खण्ड समेटिएको छ ।

त्यसैगरी, तत्कालीन प्रधानमन्त्री केपी शर्मा ओली उच्चस्तरीय चीन भ्रमणका क्रममा नेपाल र चीनबीच १२ बुँदे संयुक्त वक्तव्य जारी गर्दै काठमाडौँ चक्रपथ सुधार परियोजनाको दोस्रो चरण कार्यान्वयन गर्ने सहमति दोहोर्‍याइएको थियो ।

कलंकी देखि महाराजगञ्ज सर्भिस लेन निर्माण कार्य सुरु गरिए पनि मुख्य सडक निर्माणले गति लिन सकेको छैन । 

तस्बिर : नेपाल फोटो लाइब्रेरी