काठमाडौं – ‘नाम होस् वा बदनाम होस् तर गुमनाम नहोस्’ वाला कलाकार हुन्– दुर्गेश । बेसुरा गाएको भन्दै उनको आलोचना हुन्छ ।

तर, उनी आफूलाई पर्फमरको परिचय दिन्छन् । फेरि गीतमा स्वर दिन छाड्दैनन् ।

नाच्ने कलाका उनीसँग छ । स्टेजमा उनको प्रस्तुती धमकेदार हुनेमा भने प्रश्न छैन । त्यसैले उनी कन्सर्टमा व्यस्त हुन्छन् ।

वैशाख ५ मा भक्तपुरको सल्लाघारीमा भएको कन्सर्टको प्रमुख आकर्षण उनलाई नै बनाइएको थियो । दुर्गेश नि के कम ग्रान्ड इन्ट्री हान्न तम्सिए ।

क्रेनमा झुन्डिएर उनी स्टेजमा पुगे । प्रायः विदेशी कलाकारहरू आफ्नो प्रवेश विशेष बनाउन यस्तो गर्ने गर्छन् । हुलियै कपी गर्ने दुर्गेशका लागि इन्ट्री कपी गर्नु नौलो होइन ।

उनी अहिले ग्रान्ड इन्ट्रीकै कारण ट्रोल बनेका छन् । क्रेनको सहयोगमा झुण्डिएर स्टेजमा ल्यान्ड गर्न तालमेल मिलेन । हावामै उनी यताउती हल्लिए । ल्यान्ड हुन पनि समय लाग्यो । क्रेन अपरेटरसँग उनको तालमेन मिलेन ।

ल्यान्डिङमा तालमेल नमिल्दा दर्शकहरूले उनलाई समाजिक सञ्जालमा उडाएका हुन् । हुन त कार्यक्रम स्थलमै पनि हाँसो फैलिएको थियो ।

नकारात्मक कमेन्ट पनि समाजिक सञ्जालमा प्रशस्त भेटिन्छ । केहीले कमेन्ट गरेका छन्, ‘झुन्डिएको कि ग्रान्ड इन्ट्री लिएको ?’

दुर्गेशले भने उक्त इन्ट्रीलाई प्रचार नै गरेका छन् । क्रेनमा झुण्डिएको फोटो फेसबुकै राखेका छन् ।