काठमाडौं – नेपाल विद्यार्थी संघ (नेविसंघ) अब नेपाली कांग्रेसको भातृसंस्थाका रूपमा नरहने भएको छ। नेविसंघले कार्यगत स्वायत्तता अपनाउने ऐतिहासिक निर्णय गरेको हो ।

शुक्रबार त्रिभुवन विश्वविद्यालयको स्मृति हलमा सम्पन्न नेविसंघको सिनेट बैठकले अब संगठनलाई पार्टीको प्रत्यक्ष संरचनाभन्दा बाहिर राख्दै स्वतन्त्र विद्यार्थी हितग्रही संस्थाका रूपमा अगाडि बढाउने प्रस्ताव पारित गरेको हो ।

नेविसंघ नेपाली कांग्रेसको सिद्धान्त र नीतिप्रति आस्थावान् रहे पनि पार्टीको प्रत्यक्ष प्रभाव र नियन्त्रणभन्दा बाहिर रहने गरी कार्यगत स्वायत्तताको प्रस्ताव पारित गरिएको संघका अध्यक्ष दुजाङ शेर्पा जानकारी दिए।

उनका अनुसार यस निर्णयले नेविसंघलाई स्वायत्त र स्वचालित संस्थाका रूपमा स्थापित गर्नेछ। बैठकले नेविसंघको १२औँ महाधिवेशन आगामी २०८३ साल वैशाख २० र २१ गते गर्ने प्रस्तावसमेत पारित गरेको छ।