काठमाडौं- नेकपा एमालेकी सचिव पद्‍मा अर्यालले आइतबार बस्ने पार्टी सचिवालय बैठकमा नेतृत्व परिवर्तनसम्बन्धी कुनै पनि प्रतिवेदन पेश नहुने बताएकी छिन्।

उपाध्यक्ष रामबहादुर थापा बादल र महासचिव शंकर पोखरेलसहितको कार्यदलले बनाएको प्रतिवेदन बैठकमा पेश हुँदा नेतृत्व पुनर्गठनसँग जोडिएका कुनै पनि कुरा नराख्ने उनले प्रष्ट्याएकी हुन् ।

‘एउटै प्रतिवेदन जान्छ । तीनवटा प्रतिवेदन होइन, ती केवल विषयगत मस्यौदा मात्र थिए । हिजो विभिन्न कोणबाट आएका सुझाव मस्यौदा हुन्,’ उनले भनिन्, ‘कार्यदलले एकीकृत गरेर फाइनल गरेपछि मात्र त्यो प्रतिवेदन हुन्छ । ” उनले भनिन, “आज संयोजकज्यूले मस्यौदा पेस गर्नुभयो, त्यसमा आवश्यक थपघट गरेर हामीले पारित गरेका छौँ ।’

पछिल्लो समय एमालेमा केपी शर्मा ओलीको नेतृत्व परिवर्तन हुनुपर्ने आवाज सातै प्रदेशबाट उठिरहेको छ। ओ‌लीले भने विभिन्न बहाना गरेर प्रतिवेदनलाई रोक्ने प्रयत्न गरिरहेका छन् । त्यसकै लागि उनले कार्यदलमै नरहेका नेता प्रदीप ज्ञवालीलाई तेस्रो प्रतिवेदन लेखाएका छन्।