काठमाडौं- नेकपा (एमाले) अध्यक्ष केपी शर्मा ओली पत्रकारसँग आक्रोशित देखिएका छन्। आइतबार पार्टी केन्द्रीय कार्यालय च्यासलमा पत्रकारले प्रश्न गरेपछि ओलीले पत्रकारिताको मर्यादा र उनीहरूको शैलीबारे असन्तुष्टि जनाउँदै ‘बुम ल्याएर थुतुनो नघोच्न’ आग्रह गरे।

आइतबार दिउँसो १ बजेका लागि बोलाइएको एमाले सचिवालय बैठक समयमै बस्न नसकेपछि ओली करिब आधा घण्टा पार्टी कार्यालयमा बसेर बाहिरिएका हुन्। बैठक दिउँसो ३ बजेका लागि सारिएको छ।

पार्टी कार्यालयबाट बाहिरिने क्रममा पत्रकारहरूले कार्यदल, पार्टी पुनर्गठन र पछिल्लो आन्तरिक विवादबारे प्रश्न गर्न खोजेपछि ओलीले पत्रकारहरूलाई प्रश्न गर्ने शैली सुधार्न आग्रह गरे।

‘दुनियाँभर पत्रकारिताको नियम हुन्छ। तपाईंसँग प्रश्न सोध्न सक्छु भनिन्छ सबैभन्दा पहिले। त्यसपछि तपाईंले भन्नुभएको कुरा, भनाइलाई प्रकाशित गर्नुअघि प्रकाशित गरौँ भनेर सोध्नुपर्छ,’ ओलीले भने।

उनले समाचारका लागि प्रश्न गर्दा समेत पत्रकारले सभ्य शैली अपनाउनुपर्ने बताए। ‘कम्तीमा समाचार प्रकाशित गर्ने गरी प्रश्न गरौँ न। तपाईंहरू बुम ल्याएर थुतुनो घोच्न आइपुग्नुहुन्छ। मुखमा घोचेरै प्रश्न गर्नुहुन्छ। त्यसो नगर्नुस्, सभ्य भएर प्रश्न सोध्नुस्,’ उनले भने।

पत्रकारहरूले एमालेको निर्वाचन समीक्षा तथा पार्टी पुनर्गठनसम्बन्धी कार्यदल र पछिल्लो आन्तरिक विवादबारे थप प्रश्न गर्न खोजे पनि ओलीले त्यसको जवाफ दिएनन्। उनी पत्रकारको प्रश्नको जवाफ नदिई पार्टी कार्यालयबाट बाहिरिएका थिए।

एमालेभित्र पछिल्लो समय अध्यक्ष ओलीको नेतृत्वलाई लिएर विवाद चर्किएको छ। पार्टीका विभिन्न कमिटीमा नेतृत्व परिवर्तनको माग उठिरहेका बेला महासचिव शंकर पोखरेलले पनि नेतृत्व परिवर्तन र पार्टी पुनर्गठनको विषय समेटेर प्रतिवेदन अघि सारेका छन्।

यसैबीच ओलीको बचाउमा पूर्वउपमहासचिव तथा केन्द्रीय सदस्य प्रदीप ज्ञवालीले अर्को प्रतिवेदन तयार पारेका छन्। ज्ञवालीको प्रतिवेदनमा ओली नेतृत्वको प्रशंसा गर्दै नेतृत्व परिवर्तनको मागलाई असान्दर्भिक ठहर गर्ने धारणा अघि सारिएको छ।