काठमाडौं- अर्जेन्टिनाका कप्तान लियोनेल मेस्सीले विश्वकपको फाइनलअघि सम्पूर्ण अर्जेन्टिनी समर्थक र आफ्ना टोलीका सदस्यलाई भावुक सन्देश दिएका छन्।

सामाजिक सञ्जालमार्फत् सार्वजनिक सन्देशमा मेस्सीले उपाधिभन्दा पनि टोलीसँग बिताएको यात्रा आफ्नो लागि सबैभन्दा मूल्यवान् रहेको बताएका छन्।

‘यी सबै वर्षहरूको सबैभन्दा सुन्दर कुरा केवल उपाधि जित्नु होइन, त्यो सम्पूर्ण यात्रा हो,’ उनले लेखेका छन्।

मेस्सीले टोलीसँगको दैनिक जीवन, सँगै प्रतिस्पर्धा गरेको समय, कठिन क्षणमा एकअर्कालाई साथ दिएको अनुभव र यात्राको प्रत्येक पललाई अविस्मरणीय रहेको उल्लेख गरेका छन्।

उनले आफ्ना सबै टोलीका साथी, प्रशिक्षक समूह तथा राष्ट्रिय टोलीलाई परिवारझैँ बनाइराख्न निरन्तर मेहनत गर्ने सम्पूर्ण सदस्यप्रति आभार पनि व्यक्त गरेका छन्।

‘भोलि जे भए पनि, यो टोलीले यस्तो इतिहास रचिसकेको छ, जसलाई हामी कहिल्यै बिर्सने छैनौं र कसैले पनि मेटाउन सक्दैन,’ मेस्सीले सन्देशमा भनेका छन्। उनले समर्थकहरूलाई टोलीको साथमा उभिन आग्रह गरेका छन् ।

अर्जेन्टिना आइतबार हुने विश्वकप फाइनलमा स्पेनसँग उपाधिका लागि प्रतिस्पर्धा गर्दैछ। यो फाइनल मेस्सीको अन्तिम विश्वकप खेल हुन सक्ने चर्चा भइरहेका बेला उनको सन्देशले समर्थकमाझ थप भावनात्मक माहोल सिर्जना गरेको छ।