अम्मान- जोर्डनस्थित मुवाफ्फक सल्ती एयरबेसमा गएराति भएको मिसाइल आक्रमणमा दुई अमेरिकी सैनिकको मृत्यु भएको छ । समाचार अनुसार अन्य केही सैनिक घाइते भएका छन्।

रिपोर्टका अनुसार आक्रमणमा ब्यालिस्टिक मिसाइल प्रयोग गरिएको थियो। घटनासम्बन्धी एउटा भिडियो पनि सार्वजनिक भएको छ, तर त्यसको स्वतन्त्र पुष्टि हुन सकेको छैन।

इरानले भने यस घटनाबारे हालसम्म कुनै आधिकारिक प्रतिक्रिया दिएको छैन।

उता अमेरिकी सेनाले जोर्डनमा दुई अमेरिकी सैनिकको मृत्युको प्रतिशोधस्वरूप इरानको इस्लामिक रिभोलुसनरी गार्ड कोर्प्स (आईआरजीसी) का ठेगानामा हवाई आक्रमण गरिएको जनाएको छ।

अमेरिकी सेन्ट्रल कमान्ड (सेन्टकम) का अनुसार जोर्डन आक्रमणमा संलग्न रहेको दाबी गरिएका समूहलाई लक्षित गर्दै कारबाही गरिएको हो।

केश्म टापुनजिक आक्रमण

इरानको मेहर समाचार एजेन्सीका अनुसार अमेरिकी सेनाले केश्म टापुनजिकैको एक स्थानमा हवाई आक्रमण गरेको छ। एजेन्सीले उक्त आक्रमणमा कुनै सर्वसाधारण हताहत नभएको र आवासीय वा व्यावसायिक संरचनामा क्षति नपुगेको दाबी गरेको छ।

उता अमेरिकाले लगातार आठौँ रात पनि इरानमाथि हवाई आक्रमण जारी राखेको छ। अमेरिकी सेनाका अनुसार आक्रमणमा इरानका विभिन्न सैन्य अड्डा र हतियार भण्डारण स्थललाई निशाना बनाइएको थियो।

सेन्ट्रल कमान्डले राष्ट्रपति डोनाल्ड ट्रम्पको निर्देशनमा इरानविरुद्धको आठौँ चरणको हवाई आक्रमण सम्पन्न भएको जनाएको छ। अमेरिकी सेनाका अनुसार यो सैन्य अभियान लगातार आठ रातसम्म सञ्चालन गरिएको हो।