न्युयोर्क – विश्वकप फुटबलमा पहिलो पटक प्रयोगमा ल्याइएको ‘हाइड्रेशन ब्रेक’ प्रति दर्शकहरूले असन्तुष्टि जनाएपछि विश्व फुटबलको सर्वोच्च निकाय (फिफा) ले यसलाई निरन्तरता नदिने संकेत गरेको छ। फिफाका फुटबल विकास प्रमुख आर्सिन वेंगरले यस नियमलाई आगामी प्रतियोगितामा निरन्तरता दिने वा नदिनेबारे अहिलेसम्म कुनै ठोस निर्णय भइनसकेको स्वीकार गरेका छन्।

स्पेन र अर्जेन्टिनाबीच आइतबार हुने फाइनल खेलको पूर्वसन्ध्यामा न्युयोर्क न्युजर्सी स्टेडियममा आयोजित पत्रकार सम्मेलनमा वेंगरले खेलको बीचमा तीन मिनेटको अनिवार्य विश्राम दिँदा खेलाडीको क्षमता वा खेलको बहावमा कुनै सकारात्मक सुधार आएको डाटा फिफासँग नरहेको स्पष्ट पारे। आर्सनलका पूर्वप्रबन्धक समेत रहेका वेंगरले भने, “केही मानिसहरूले यसलाई मन पराएका छैनन्। विश्वकपछि हामी यसको प्रभावबारे विस्तृत विश्लेषण गर्नेछौँ।”

वेंगरले यो नियमले खेलको नतिजामा कुनै प्रभाव नपारेको दाबी गरे पनि फुटबलप्रेमीहरूको भावनालाई कदर गर्दै आवश्यक निष्कर्षमा पुग्ने बताए। फिफाले यसै विश्वकपदेखि लागू गरेको ‘उपचारका लागि मैदानबाहिर जानुपर्ने’ एक मिनेटको नियमको प्रशंसा गरे पनि हाइड्रेशन ब्रेकका सवालमा भने फिफा रक्षात्मक देखिएको छ।