झापा- यहाँस्थित बिर्तामोड नगरपालिका वडा नम्बर-५ अन्नपूर्ण चोकमा घरायसी विवादका क्रममा एकजना वृद्धको मृत्यु भएको छ । उक्त विवादमा उनकी श्रीमती घाइते भएकी छन् ।

प्रहरीका अनुसार बिहीबार साँझ करिब ५ : ३० बजे ७२ वर्षीय धिरेन राजवंशीले घरायसी विवादका क्रममा ६५ वर्षीया श्रीमती गंगामुनी राजवंशीको पेटमा फलामको रडले हानेका थिए । त्यसक्रममा उनी घाइते भइन्।

घाइते गंगामुनीलाई उपचारका लागि बिर्तासिटी अस्पताल लगिएको छ । उनको पेटमा चोट लागेको पाइएको छ। उनको उपचार भइरहेको अवस्थामा धिरेनले घरको तेस्रो तलाबाट हाम्फालेका थिए।

हाम्फालेपछि गम्भीर घाइते उनलाई तत्काल उपचारका लागि बिर्तासिटी अस्पताल लगिएको थियो । तर उनको बिहीबार साँझ पौने ७ बजे बजे मृत्यु भएको प्रहरीले जनाएको छ ।