काठमाडौं – सरकारले हरेक वर्ष आयोजना गर्दै आएको ‘राष्ट्रिय चलचित्र पुरस्कार’को यस संस्करणमा पनि ‘जुरी प्रोत्साहन’ विधालाई निरन्तरता दिइएको छ ।

यो विधामा दिइने अवार्ड सधैँ विवादमा पर्दै आएको छ । यसपालि प्रोत्साहन अवार्ड निर्माताले एकल लिडमा विश्वास गरिसकेकी नायिका आना शर्मालाई दिइएको छ । अर्थात्, अवार्डको विधा प्रोत्सहान छ, तर एक्पोजर पाइसकेकी नायिकालाई अवार्ड दिइएको छ ।

आनाको डेब्यू फिल्म १० वर्षअगाडि प्रदर्शनमा आएको थियो । उनले आधा दर्जन फिल्ममा शीर्ष नायिकामा रुपमा अभिनय गरिसकेकी छन् । तर, उनैलाई प्रोत्साहन अवार्ड दिएको छ । अझ उनी प्राइममा रहेका महँगा हिरो अनमोल केसीको फिल्मबाट डेब्यू गर्न पाएकी नायिका हुन् ।

गत वर्षका उनी एकल शीर्ष भूमिकामा रहेको फिल्म ‘रमिताको पिरती’ प्रदर्शनमा आएको थियो । यही फिल्मबाट उनलाई अवार्ड दिइएको हो ।

विगतका वर्षमा पनि यो विधाको अवार्ड वितरणबारे प्रश्न उठ्ने र आलोचना हुँदै आएको थियो । गत वर्ष नायक प्रदीप खड्काले र ०८० मा नायिका स्वस्तिमा खड्काले यो विधाको अवार्ड पाएका थिए ।

अवार्डको शीर्षक प्रोत्साहन भए पनि स्थापित व्यक्तित्वहरूलाई प्रदान गरिदा विवाद उत्पन्न हुने गरेको हो । यो वर्ष पनि त्यही भएको छ । स्टारहरूलाई खुसी पार्न यो विदाको अवार्डको दुरुपयोग भएको कुरा उठ्दै आएको छ ।