बेरूत- दक्षिणी लेबनानमा हिजबुल्लाहको एक आक्रमणमा ट्यांक बटालियन कमान्डरसहित चारजना इजरायली सैनिकको मृत्यु भएको छ ।

इजरायली सेनाले (आईडीएफ) आइतबार उक्त कुराको पुष्टि गरेको छ। टाइम्स अफ इजरायलका अनुसार मृत्यु भएकामा एकजना उच्च सैन्य अधिकारी लेफ्टिनेन्ट कर्नेल डोर गेडालिया बेन सिम्होन पनि छन्।

उनी ३२ वर्षको उमेरमा मारिएका हुन् । इजरायलको ४०१ औं आर्मर्ड ब्रिगेडको ५२ औं बटालियनका कमान्डरका रुपमाा कार्यरत उनी मारिएपछि इजरायललाई ठूलो झट्का लागेको छ।

यो घटना शुक्रबार दक्षिणी लेबनानको कफर तेबनित गाउँमा भएको हो। प्रारम्भिक जानकारीअनुसार बटालियन कमान्डरको ट्यांकलाई शंकास्पद ड्रोन वा एन्टी-ट्यांक मिसाइलले निशाना बनाएको थियो।

आक्रमणमा ट्यांकमा सवार चारैजना सैनिकको मृत्यु भएको छ। यद्यपि विस्फोटको सही कारण पत्ता लगाउन आईडीएफले अझै अनुसन्धान गरिरहेको छ।