काठमाडौं– सरकारले मूल्य अभिवृद्धि गर्ने उद्देश्य राखेर सवारी साधनको एसम्बल गरी उत्पादन गर्ने उद्योगलाई ५० प्रतिशत अन्तःशुल्क छुट दिने व्यवस्था गरेको छ । तर, मोटरसाइकल उत्पादनमा भने एक उद्योगले १ प्रतिशत कम मूल्यअभिवृद्धि गरेर पछिल्लो तीन वर्षमा अरबौँ कर छुट लिएको महालेखापरीक्षक कार्यालयले औँल्याएको छ ।

महालेखापरीक्षक कार्यालयको ६३औँ प्रतिवेदनले ठूला करदाता कार्यालयमा दर्ता भएको मोटरसाइकल एसेम्बल गर्ने एक कम्पनीले अन्तःशुल्क र मूल्य अभिवृद्धि करवापत ६ अर्ब ६४ करोड २६ लाख ४६ हजार रुपैयाँ छुट लिएको तर, खरिद लागतमा भने जम्मा १८ करोड १८ लाख १९ हजार रुपैयाँ मात्रै प्रत्यक्ष खर्च थप गरेको औँल्याएको छ । जुन जम्मा ०.९१ प्रतिशत मूल्य अभिवृद्धि हो ।

त्यस्तै, आन्तरिक राजस्व कार्यालय ललितपुरमा दर्ता भएको अर्को सवारी साधन एसेम्बनल कम्पनीले पनि १५ करोड ४९ लाख १९ हजार अन्तःशुल्क र मूल्य अभिवृद्धि कर छुट लिएर जम्मा १ करोड ५६ लाख ३३ हजार बराबरको मात्रै प्रत्यक्ष खर्च थप गरेको महालेखाले औँल्याएको छ ।

महालेखाले एसेम्बल उद्योगलाई प्रदान गरिएको अन्तःशुल्क छुटबाट अपेक्षित रूपमा मूल्य अभिवृद्धि नभएको र स्वदेशी कच्चापदार्थको उपयोग नभएकोले यस प्रकृतिको छुटमा पुनरावलोकन गर्नुपर्ने औँल्याएको छ ।