भोजपुर– नवौँ संस्करणको भोजपुर गोल्डकप फुटबल प्रतियोगिता आजबाट सुरु हुँदैछ ।

भोजपुर नगरपालिका–७ स्थित रङ्गशालामा सञ्चालन हुने प्रतियोगिताको उद्घाटन खेलमा आज सशस्त्र प्रहरी बल (एपीएफ) नेपाल र एलएक्स सिटी मोरङबीच प्रतिस्पर्धा हुँदैछ ।

प्रतियोगितामा एपीएफ नेपाल, एलएक्स सिटी मोरङ, भोजपुर जिल्ला फुटबल सङ्घ, सङ्खुवासभा–११, सातदोबाटो युथ क्लब (ललितपुर), केपिलासगढी गाउँपालिका (खोटाङ), प्लानिङ ब्वाइज युनाइटेड (काठमाडौँ) र द गोर्खाज फुटबल क्लब (उदयपुर) गरी ८ टोली सहभागी छन् ।

प्रतियोगिता वैशाख १२ गतेसम्म सञ्चालन हुनेछ । प्रतियोगिताका विजेता तथा उपविजेताले उपाधिसहित क्रमशः पाँच लाख र तीन लाख रुपैयाँ प्राप्त गर्नेछन् ।

अन्य व्यक्तिगत विधातर्फ सर्वोकृष्ट खेलाडी, सर्वाधिक गोलकर्ता, उत्कृष्ट गोल रक्षकलाई पुरस्कारको व्यवस्था गरिएको आयोजकले जनाएको छ ।