तेहरान- इरानमा सर्वोच्च नेता अली खामेनेईसहित ४० भन्दा बढी अधिकारी मारिएपछि अमेरिकी राष्ट्रपति डोनाल्ड ट्रम्पले यो युद्धमा ठूलो सफलता मिलेको बताएाक थिए । तर इरानमाथि हमलाको १७ दिनपछि अवस्था फेरिएको छ। युद्धको कुनै स्पष्ट अन्त्यको उपाय देखिएको छैन।

इरानले अमेरिकी-इजरायली हमलाको जवाफमा होर्मुज स्ट्रेट हुँदै हुने तेल आपूर्ति बन्द गरिदिएको छ, जसले विश्व अर्थतन्त्रमा ठूलो असर पारेको छ। अहिले अमेरिकी राष्ट्रपति डोनाल्ड ट्रम्पले आफ्ना सहयोगी नाटो देशहरूसँग होर्मुज मार्ग खुलाउन आग्रह गरिरहेका छन्।

तर नाटो देशहरूले स्पष्ट रूपमा उनीहरूले होर्मुज स्ट्रेटमा आफ्ना युद्धपोत नपठाउने बताएका छन्। यो निर्णय त्यतिबेला आएको हो, जब ट्रम्पले यदि नाटो देशहरूले यो महत्वपूर्ण समुद्री मार्ग खुलाउन सहयोग नगरे नाटोको भविष्य नै कमजोर हुन सक्ने चेतावनी दिएका थिए ।

अमेरिकी अधिकारीकै दाबी : इरानले परमाणु कार्यक्रम फेरि सुरु गरेको छैन

अमेरिकी जासुसी एजेन्सीकी प्रमुख तुलसी गबार्डका अनुसार इरानले आफ्नो परमाणु कार्यक्रम फेरि सुरु नगरेको बताएकी छन्। उनले गत वर्ष जुनमा भएका हमलापछि इरानको यो क्षमता लगभग समाप्त भएयता यो कार्यक्रम अघि नबढाएको बताइन् ।

यो कुरा राष्ट्रपति ट्रम्पको दाबीभन्दा फरक छ। ट्रम्पले भने लगातार इरानको परमाणु कार्यक्रम खतरा भएको भन्दै युद्ध आवश्यक रहेको बताएका थिए।

गबार्डले २०२५ मा अमेरिका र इजरायलका हमलापछि पनि इरानले आफ्नो परमाणु कार्यक्रम पुनः सुरु गर्ने प्रयास नगरेको बताइन् ।

यसैबीच, डेमोक्रेटिक नेता मार्क वार्नरले गबार्डले ट्रम्पको भनाइसँग नमिल्ने महत्वपूर्ण कुरा सार्वजनिक नगरेको बताएका छन्।

इरानले पहिलेदेखि नै आफू परमाणु हतियार बनाउने योजनामा नभएको दाबी गर्दै आएको छ। केही विशेषज्ञहरूले पनि हालका लागि इरानबाट तत्काल ठूलो खतरा नभएको बताइसकेका छन् ।