काठमाडौं- राष्ट्रिय स्वतन्त्र पार्टी रास्वपाले चुनावप् घोषणापत्र सार्वजनिक गरेको छ । फागुन २१ गतेको प्रतिनिधिसभा सदस्य निर्वाचनका लागि रास्वपाले ‘वाचापत्र’ सार्वजनिक गरेको हो । बिहीबार कर्णाली प्रदेशको राजधानी सुर्खेतमा आयोजित चुनावी सभामा रास्वपाले वाचापत्र सार्वजनिक गरेको हो ।

वाचापत्रमा रास्वपाले नेपाल भित्रिने पर्यटकको सङ्ख्या र उनीहरूको प्रतिव्यक्ति खर्चलाई पाँच वर्षभित्र दोब्बर पार्ने महत्वकांक्षी घोषणा गरेको छ । रास्वपाले पर्यटकको औसत बसाइ लम्ब्याउन आवश्यक नीतिहरू कार्यान्वयन गर्ने, ट्रेकिङ्ग–केन्द्रित पर्यटनलाई विविधीकरण गर्न प्रकृति, संस्कृति, समुदाय जोड्दै नयाँ ‘इकोसिस्टम’ स्थापनामा ध्यान दिने जनाएको छ ।

‘कर्णाली र सुदूरपश्चिमलाई विशेष ध्यान दिई नयाँ पर्यटकीय गन्तव्यहरू स्थापित गर्नेछौँ । सडकले विगतका पदमार्ग ध्वस्त पारेका ठाउँमा वैकल्पिक पदमार्ग बनाउन बजेट छुट्याउने छौँ ।’ रास्वपाको वाचापत्रमा उल्लेख छ ।

वाचापत्र सार्वजनिक कार्यक्रममा पार्टीका सभापति रवि लामिछाने, वरिष्ठ नेता बालेन्द्र शाह (बालेन), उपसभापति डीपी अर्याल, डा. स्वर्णिम वाग्लेसहितका नेताहरू सहभागी थिए । रास्वपाले आफ्नो वाचापत्रमा मध्यम वर्गलाई विशेष महत्व दिएको जनाएको छ ।